رواں برس اپریل کے دوران گندم کی برآمدات میں ریکارڈ اضافے سے برآمدات کا حجم 3لاکھ ٹن سے تجاوز کرگیا

جمعہ 4 مئی 2018 23:29

اسلام آباد (اُردو پوائنٹ اخبارتازہ ترین۔ 04 مئی2018ء) رواں برس اپریل کے دوران گندم کی برآمدات میں ریکارڈ اضافے سے برآمدات کا حجم 3لاکھ ٹن سے تجاوز کرگیا جو ملکی تاریخ میں ایک ماہ کے دوران کی جانے والی گندم کی سب سے زیادہ برآمدات ہیں۔ وفاق ایوان ہائے صنعت وتجارت پاکستان کی قائمہ کمیٹی برائے برآمدات کے چیئرمین محمود مولوی نے کہا کہ حکومت نے رواں مالی سال کے اختتام تک سمندر کے ذریعے گندم کا برآمدی ہدف1.4 ملین ٹن حاصل کرلیا جائے گا۔

(جاری ہے)

انہوں نے کہا کہ برآمد کنندگان کے اقدامات سے مارچ 2018ء کے دوران سمندری راستے سے 2 لاکھ 41 ہزار 522 میٹرک ٹن گندم برآمد کی گئی ہے جس کی مالیت 47 ملین ڈالر سے زائد رہی ہے ،ْاپریل کے دوران برآمدات 3 لاکھ ٹن سے تجاوز کرگئیں۔ انہوںنے کہاکہ دسمبر 2017ء میں حکومت نے گندم اور اس کی مصنوعات کی برآمدات کیلئے 23 ملین ٹن کا ہدف مقرر کیا تھا تاکہ ملک میں موجود گندم کے اضافی ذخیرہ کو برآمد کرکے قیمتی زرمبادلہ کمایا جاسکے۔محمود مولوی نے کہا کہ مئی 2018ء کے آخرتک 1.4 ملین ٹن گندم کا برآمدی ہدف حاصل کرلیا جائیگا جو ملکی تاریخ میں ایک نیا ریکارڈ ہوگا۔ چیئرمین کمیٹی نے بتایا کہ بنگلا دیش، انڈونیشیا، ویتنام ، دبئی اورعمان سمیت مختلف ممالک کو گندم برآمد کی جارہی ہے۔