عدالت کی جانب سے سزا یافتہ بشریٰ بی بی اور بانی پی ٹی آئی اس وقت جوڈیشل کسٹڈی میں ہیں، رانا ثناء اللہ

جمعرات 7 مئی 2026 19:45

اسلام آباد (اُردو پوائنٹ اخبارتازہ ترین - اے پی پی۔ 07 مئی2026ء) مشیر وزیراعظم برائے سیاسی امور رانا ثناء اللہ نے کہا ہے کہ عدالت کی جانب سے سزا یافتہ بشریٰ بی بی اور بانی پی ٹی آئی اس وقت جوڈیشل کسٹڈی میں ہیں۔سینیٹ اجلاس میں جمعرات کو انہوں نے کہا کہ بشریٰ بی بی کی جیل میں رہائشی سہولیات اور صحت سے متعلق معاملات پر سپریم کورٹ آف پاکستان میں باقاعدہ بحث ہو چکی ہے۔

انہوں نے کہا کہ وکیل سلمان صفدر نے بطور فرینڈ آف کورٹ جیل کا دورہ کرنے کے بعد اپنی تفصیلی رپورٹ عدالت میں پیش کی۔

(جاری ہے)

رانا ثناء اللہ نے کہا کہ چیف جسٹس کے مطابق جیل سپرنٹنڈنٹ اور سلمان صفدر کی رپورٹس میں فراہم کردہ سہولیات کے حوالے سے مطابقت پائی گئی۔ انہوں نے مزید کہا کہ بشریٰ بی بی کا علاج جیل حکام کی ذمہ داری ہے اور یہ ذمہ داری بہتر انداز میں ادا کی جا رہی ہے۔

انہوں نے کہا کہ چونکہ بشریٰ بی بی جوڈیشل کسٹڈی میں ہیں، اس لئے کسی بھی شکایت کی صورت میں عدالت سے رجوع کیا جا سکتا ہے۔ انہوں نے کہاکہ جیل میں فراہم کردہ سہولیات اور علاج سے متعلق تمام معاملات قانونی ضابطوں کے مطابق چل رہے ہیں جبکہ بشریٰ بی بی کی صحت اور سہولیات سے متعلق رپورٹ پہلے ہی سپریم کورٹ میں زیر بحث لائی جا چکی ہے۔