اسٹیل مل ملازمین کا دھرنا ختم ،ٹرینوں کی آمدورفت بحال

بدھ مئی 16:03

کراچی(اُردو پوائنٹ اخبارتازہ ترین۔ 16 مئی2018ء) پاکستان اسٹیل کے ملازمین کے ریلوے ٹریک پر دھرنے کی وجہ سے ملک بھر سے کراچی کے لئے ٹرینوں کی آمدورفت کئی گھنٹے معطل رہی تاہم مذاکرات کے زریعے دھرنے کے خاتمے کے بعدریلوے ٹریک کو بحال کردیا گیاہے ۔۔ریلوے ٹریک کی بحالی کے بعد حیدرآباد اور کوٹری ریلوے اسٹیشنوں پر روکی گئی 7 ٹرینوں کو کراچی روانہ کردیا گیا، پولیس حکام کے مطابق پاکستان اسٹیل کے ملازمین اپنے مطالبات کے حق میں احتجاج پر ہیں۔

بدھ کی صبح پاکستان اسٹیل کے سینکڑوں ملازمین اسٹیل ٹائون کے قریب کراچی سے ملک کے مختلف شہروں کو ملانے والے ریلوے کے دوطرفہ ٹریک پر دھرنا دے کربیٹھ گئے۔۔ریلوے حکام کے مطابق کراچی سے جانے والی بیشتر ریل گاڑیاں دھرنے سے قبل روانہ ہوچکی تھیں تاہم ڈائون روٹ کی بیشتر ٹرینوں کی آمد شیڈول پر تھی، جس پر بہائوالدین زکریا ایکسپریس، علامہ اقبال ایکسپریس، بزنس ٹرین، ملت ایکسپریس، مہران ایکسپریس، قراقرم ایکسپریس اور تیزگام کو حیدرآباد اور کوٹری ریلوے اسٹیشنوں پر روک دیا گیا تھا۔

(جاری ہے)

ریلوے اور ڈسٹرکٹ پولیس اور رینجرز نے موقع پر پہنچ کر مظاہرین سے مذاکرات کئے، یوں کئی گھنٹے بعد ٹریک سے دھرنا ختم کرایا گیا اور ریلوے ٹریک کو مظاہرین سے خالی کرواکر حیدرآباد اور کوٹری ریلوے اسٹیشنوں پر روکی گئی ساتوں ٹرینوں کو کراچی کے لیے روانہ کر دیا گیا۔۔ریلوے حکام کے مطابق اگرچہ ٹرینوں کی آمدورفت بحال ہوگئی ہے تاہم اس صورتحال سے ایک طرف سینکڑوں مسافروں کو تکلیف برداشت کرنا پڑی دوسری طرف کی ٹرینوں کی کراچی سے اندرون ملک روانگی متاثر ہو سکتی ہے تاہم ریلوے حکام کے مطابق ٹرینوں کو معمول کے وقت پر کراچی سے اندرون ملک روانہ کرنے کی بھرپور کوشش کی جائے گی۔