رمضان کو پاکستان کا قیام اللہ کا خاص انعام ہے،عوام حقیقی تبدیلی، اسلامی فلاحی جمہوری ریاست کے قیام کیلئے انتخابات میں ایم ایم اے کے صادق و امین امیدوار وں کو کامیاب بنائیں، اسداللہ بھٹو

پیر 11 جون 2018 20:42

کراچی(اُردو پوائنٹ اخبارتازہ ترین۔ 11 جون2018ء) نائب امیر جماعت اسلامی پاکستان و متحدہ مجلس عمل کے این اے 242 پر نامزد امیدوار اسداللہ بھٹو نے کہا کہ 27 رمضان کو پاکستان کا قیام اللہ کا خاص انعام ہے عوام ملک میں حقیقی تبدیلی، اسلامی جمہوری و فلاحی ریاست کے قیام کیلئے انتخابات میں متحدہ مجلس عمل کے صادق و امین نمائندوں کو کامیاب بنائیں۔ وہ جماعت اسلامی کے تحت کنیز فاطمہ سوسائٹی میں منعقدہ عوامی دعوت افطار سے خطاب کررہے تھے۔

(جاری ہے)

اسداللہ بھٹو نے مزید کہا کہ رمضان نزول قرآن، لیلةالقدر ، یوم باب الاسلام، فتح مکہ، یوم بدر جیسی فتوحات کے ساتھ 27 رمضان قیام پاکستان کا مہینہ ہے۔ پاکستان امت کی امیدوں کی کرن ہیںدیانتدار اور اہل قیادت ہی ملک کو ترقی کی طرف گامزن اور امت کے خوابوں کو پورا کرسکتی ہے۔ پاکستان اسلام کلمہ طیبہ اور جس نظریے کی بنیاد پر بنا تھا گذشتہ 70 سال سے بر سر اقتدار آنے والے غیروں کے غلام حکمراں اس کی بنیاد کو کھوکھلا کرنے میں لگے رہے۔ جمعہ کی چھٹی، سودی نظام معیشت ، غیروں کی غلامی اور فحاشی و عریانی کا سیلاب اس کی واضح مثال ہے۔ متحدہ مجلس عمل اقتدار میں آکر سودی نظام کا خاتمہ ، آزاد و خود مختار خارجہ پالیسی اسلام و نظریہ پاکستان سے ہم آہنگ یکساںنظام تعلیم دے گی۔#