انتخابی مہم کے دوران مختلف سیاسی جماعتوں کے جلسوں پر ہونے والے دہشتگردانہ حملے انتہائی افسوسناک ہیں

سپیکر قومی اسمبلی ایاز صادق کی نجی ٹی وی چینل سے گفتگو

ہفتہ 14 جولائی 2018 23:09

انتخابی مہم کے دوران مختلف سیاسی جماعتوں کے جلسوں پر ہونے والے دہشتگردانہ ..

اسلام آباد ۔ (اُردو پوائنٹ اخبارتازہ ترین - اے پی پی۔ 14 جولائی2018ء) قومی اسمبلی کے سپیکر ایاز صادق نے کہا ہے کہ ملک میں ہونے والے عام انتخابات کی انتخابی مہم کے دوران مختلف سیاسی جماعتوں کے جلسوں پر ہونے والے دہشتگردانہ حملے انتہائی افسوسناک ہیں جن کی پر زور مذمت کرتے ہیں۔ ہفتہ کو ایک نجی ٹی وی چینل سے بات چیت کرتے ہوئے انہوں نے دہشت گردی سمیت دیگر موجودہ مسائل کے حل، پانی کی قلت کے خطرے کو کم کرنے اور ملکی معیشت کے فروغ کے لیے تمام سیاسی جماعتوں کے متحد ہونے کی ضرورت پر زور دیا۔

(جاری ہے)

انہوں نے کہا کہ پاکستان مسلم لیگ (ن) مستونگ میں ہونے والے افسوسناک واقعہ کی شدید مذمت کرتی ہے جس میں کئی قیمتی جانیں ضائع ہوئیں اور بہت سے بے گناہ افراد زخمی بھی ہوئے ہیں۔ سپیکر قومی اسمبلی کا کہنا تھا کہ پاکستان مسلم لیگ (ن) 25 جولائی کو ہونے والے عام انتخابات کا بائیکاٹ نہیں کرے گی کیونکہ ہماری جماعت ہمیشہ ملک میں جمہوریت کو مضبوط کرنا چاہتی ہے۔ ایک سوال کے جواب میں انہوں نے کہا کہ پاکستان مسلم لیگ (ن) نے عدلیہ پر تنقید نہیں کی تاہم اس نے سابق وزیراعظم محمد نواز شریف اور ان کی صاحبزادی مریم نواز کے خلاف آنے والے عدالتی فیصلے پر اپنے تحفظات کا اظہار کیا ہے