سویلین ایمپلائز کوآپریٹو ہائوسنگ سوسائٹی الیکشن میں کوآپریٹو ڈیپارٹمنٹ اور الیکشن کمشنر کی جانبداری کے تحریری ثبوت بھی سامنے آگئے

محکمہ کوآپریٹوز کے جانبدار افسران اور مقرر کئے گئے الیکشن کمشنر مجسٹریٹ ڈاکٹر فیصل نے ووٹر فہرستوں میں 1156 ووٹوں کے ہیر پھیر کو پکڑنے کی بجائے جان بوجھ کو آنکھیں بند کئے رکھیں

پیر 10 ستمبر 2018 21:39

اسلام آباد (اُردو پوائنٹ اخبارتازہ ترین - آن لائن۔ 10 ستمبر2018ء) سویلین ایمپلائز کوآپریٹو ہائوسنگ سوسائٹی کے ایک ماہ پہلے ہی ہونے والے الیکشن میں کوآپریٹو ڈیپارٹمنٹ اور الیکشن کمشنر کی جانبداری کے تحریری ثبوت بھی سامنے آگئے ہیں۔ محکمہ کوآپریٹوز کے جانبدار افسران اور مقرر کئے گئے الیکشن کمشنر مجسٹریٹ ڈاکٹر فیصل نے ووٹر فہرستوں میں 1156 ووٹوں کے ہیر پھیر کو پکڑنے کی بجائے جان بوجھ کو آنکھیں بند کئے رکھیں۔

صدارتی امیدوار الیاس خان کے سگے بھانجے کو ممبر الیکشن کمیشن بنا کر مزید کام آسان کردیا گیا۔ بھانجے نے اپنے سگے ماموں کی کامیابی کو یقینی بنانے کیلئے سب کو ماموں بنا ڈالا۔ ایڈمنسٹریٹر وسیم احمد خان اور الیکشن کمشنر ڈاکٹر فیصل خاموش تماشائی بنے رہے۔

(جاری ہے)

سوسائٹی کے سابق صدر عنصر گوندل کی درخواست پر ڈپٹی کمشنر اسلام آباد حمزہ شفقات نے انکوائری کا حکم دے دیا۔

تفصیلات کے مطابق سویلین ایمپلائز کوآپریٹو ہائوسنگ سوسائٹی کے سابق صدر عنصر گوندل کی طرف سے ڈپٹی کمشنر اسلام آباد حمزہ شفقات کو درخواست دی گئی ہے کہ گزشتہ ماہ ہونے والے سوسائٹی الیکشن میں بڑے پیمانے پر دھاندلی ہوئی ہے۔ انتظامیہ کی دانستہ جانبداری کی مثال اس سے بڑھ کر کیا ہو سکتی ہے کہ صدارتی امیدوار الیاس خان کے بھانجے احسن فرید میمن کو الیکشن کمیشن ممبر بنایا گیا اور اس نے اپنے ماموں کو کامیاب بنانے کیلئے اس نے پوری انتظامیہ کو ماموں بنایا اور ووٹر لسٹ میں موجود 3261 ووٹوں کو جان بوجھ کر 4417 ظاہر کیا گیا۔

ووٹر لسٹوں کی سیریل نمبر میں دانستہ خلا جھوڑا گیا۔ مجموعی 1156 ووٹوں کا ہیر پھیر کیا گیا۔ ایڈمنسٹریٹر اور الیکشن کمشنر نے جان بوجھ کر اس فراڈ کو نہیں پکڑا۔ اپنے ماموں الیاس خان کی کامیابی کے بعد بھانجے احسن فرید میمن نے ڈھول کی تھاپ پر رقص بھی کیا۔ اس الیکشن کا قابل غور پہلو یہ بھی ہے کہ یہ الیکشن سواں گارڈن کے احاطہ میں ہوئے اور صرف 857 ووٹ کاسٹ ہوئے جبکہ پچھلے انتخابات ایف ایٹ مرکز کچہری میں ہوئے تھے۔

تو 1895 ووٹ کاسٹ ہوئے تھے۔ چونکہ ضلعی انتظامیہ کے جانبدارانہ رویئے اور الیکشن کمشنر کی ہمدردانہ سوچ نے مخصوص گروپ کیلئے یہ کام آسان کردیا۔ اس حوالے سے ڈپٹی کمشنر اسلام آباد حمزہ شفقات سے رابطہ کیا گیا تو انہوں نے کہ اکہ میرے پاس عنصر گوندل کی درخواست آگئی ہے اور میں نے انکوائری کے احکامات دے دیئے ہیں۔ انکوائری کے بعد جو رپورٹ سامنے آئے گی اس کے مطابق ایکشن لیں گے۔