سردارایازصادق کا پنجاب اسمبلی کے سپیکرملک محمد احمد خان کے نام خط ،’’کامن ویلتھ پارلیمنٹیرین آف دی ایئر‘‘ کے اعزاز سے نوازے جانے پر مبارکباد

منگل 14 اکتوبر 2025 16:26

اسلام آبا د(اُردو پوائنٹ اخبارتازہ ترین - این این آئی۔ 14 اکتوبر2025ء) اسپیکر قومی اسمبلی سردار ایاز صادق نے پنجاب اسمبلی کے سپیکر ملک محمد احمد خان کے نام خط میں انہیں کامن ویلتھ پارلیمنٹری ایسوسی ایشن (سی پی ای) کی جانب سے 68ویں کامن ویلتھ پارلیمانی کانفرنس کے دوران ’’کامن ویلتھ پارلیمنٹرین آف دی ایئر‘‘کے اعزاز سے نوازے جانے پر مبارکباد پیش کی۔

منگل کو اپنے تہنیتی پیغام میں انہوں نیکہا کہ یہ قابلِ فخر اعزاز نہ صرف اسپیکر پنجاب اسمبلی کی جمہوری اقدار، اعلیٰ پارلیمانی کارکردگی اور ادارہ جاتی اصلاحات سے وابستگی کا اعتراف ہے بلکہ یہ پوری قوم کے لیے باعثِ فخر بھی ہے۔ اٴْنہوں نے اس امر پر مسرت کا اظہار کیا کہ کسی ایشیائی ملک کے اسپیکر کو پہلی مرتبہ یہ نمایاں اعزاز حاصل ہوا ہے جو پاکستان اور پنجاب اسمبلی کے لیے انتہائی وقار و اعزاز کا باعث ہے۔

(جاری ہے)

سپیکر سردار ایاز صادق نے اٴْن کی دانشمندی کو سراہتے ہوئے کہا کہ بطور اسپیکر پنجاب اسمبلی، اٴْن کے اقدامات، جن میں قواعد و ضوابط میں جدید اصلاحات، پارلیمانی کمیٹیوں کو مضبوط بنانا، کارروائیوں کی براہِ راست نشریات کے ذریعے شفافیت کا فروغ اور علاقائی پارلیمانی کانفرنسوں کے انعقاد سے بین الپارلیمانی تعاون کو فروغ دینا شامل ہے، نے قانون سازی اور پارلیمانی طرزِ حکمرانی کے لیے نئے معیارات قائم کیے ہیں۔

انہوں نے کہا کہ یہ کامیابیاں پارلیمانی خدمات کی اعلیٰ روایات کی عکاس اور عالمی سطح پر پارلیمانی سفارتکاری میں پاکستان کے بڑھتے ہوئے کردار کی مظہر ہیں۔سپیکر قومی اسمبلی نے اراکینِ قومی اسمبلی کی جانب سے اور اپنی ذاتی حیثیت میں اسپیکر پنجاب اسمبلی کے لیے ستائش اور گرم جوش مبارکباد کا اظہار کیا۔ اٴْنہوں نے اس اٴْمید کا اظہار کیا کہ وہ جمہوری اداروں کے استحکام اور عوامی نمائندہ طرزِ حکمرانی پر اعتماد کی بحالی کے لیے اسی جذبے اور عزم کے ساتھ اپنی خدمات جاری رکھیں گے۔

سپیکر قومی اسمبلی نے اپنی اور اراکینِ قومی اسمبلی کی جانب سے سپیکر پنجاب اسمبلی کو خراج تحسین پیش کی۔ انہوں نے اس امید کا اظہار کیا کہ وہ جمہوری اداروں کے استحکام اور عوام کے نمائندہ طرزِ حکمرانی پر اعتماد کی بحالی کے لیے اسی عزم اور جذبے سے اپنی خدمات جاری رکھیں گے۔