فلو ر ملز مالکان کی مبینہ ملی بھگت ،تحصیل بھر میں آٹے کی قلت پیدا ہونے لگی

منگل 14 اکتوبر 2025 15:09

رائے ونڈ(اُردو پوائنٹ اخبارتازہ ترین - این این آئی۔ 14 اکتوبر2025ء) فلو ر ملز مالکان کی مبینہ ملی بھگت ،تحصیل بھر میں آٹے کی قلت پیدا ہونے لگی ،10اور 20کلو آٹے کا تھیلا نایاب ہوگیا ،غریب آدمی مہنگا آٹا چکی سے خریدنے پر مجبور ہیں۔

(جاری ہے)

تفصیلات کے مطابق گندم کی قیمتوں میں حالیہ اضافے کے بعد فلور ملز مالکان نے گندم کی عدم دستیابی کا بہانہ بنا کر مارکیٹ میں آٹے کی مصنوعی قلت پیدا کردی ہے ،متعدد فلور ملز مالکان سرکاری کوٹہ ملنے پر گندم کی پسوائی کرکے آٹا مارکیٹ میں دے رہے ہیں لیکن اس سے رسد اور طلب میں واضح فرق نظر آرہا ہے ،ذرائع کے مطابق متعدد فلور ملز مالکان نے باہمی گٹھ جوڑ کے بعد آٹے کی کوالٹی انتہائی ناقص کردی ہے تاکہ گاہک بد ظن ہو کر مہنگے داموں 15کلو پیکنگ خریدنے پر مجبور ہو جائے،ذرائع کے بااثر فلور ملز مالکان نے گندم ذخیرہ کررکھی ہے لیکن اس گندم کی پسوائی کی بجائے سرکاری کوٹے کی پسوائی کرکے آٹا مارکیٹ میں دے رہے ہیں جسکی تعداد انتہائی کم ہے ،ذرائع کے مطابق گندم کی موجودہ قیمت 3700روپے فی من تک پہنچ چکی ہے ،فلور ملز مالکان مہنگی گندم خرید کر سرکاری نرخوں پر آٹا فراہم کرنے سے قاصر ہیں ،حکومت کی آنکھوں میں دھول جھونک کر بااثر فلور ملز مالکان نے باہمی گٹھ جوڑ کے بعد سپر آٹے کے نام پر 15کلو پیکنگ متعارف کروادی ہے جس کا معیار سرکاری آٹے کے معیار سے بہتر رکھا گیا ہے تاکہ گاہک سرکاری آٹے کی خریداری کی بجائے 15کلو پیکنگ خریدے ،ذرائع کے مطابق فلور ملز مالکان نے گندم کی قیمتوں میں اضافے کے بعد آٹے کے معیار میں نمایاں کمی کردی ہے جس سے گاہک پریشان نظر آرہا ہے ،حکومت کی ناقص حکمت عملی کے باعث تحصیل رائے ونڈ میں آئندہ چند روز میں آٹے کی مصنوعی قلت میں مزید اضافہ ہونے کا خدشہ ہے ۔