ضمنی مالیاتی بل کا بنیادی مقصد مالی سال 2018-19ء کے لئے مرتب کئے جانے والے بجٹ کی سمت کو درست کرنا ہے‘

وزیراعظم عمران خان کی قیادت میں ملک کی سمت درست کرنے کی کوشش کر رہے ہیں‘ 2013ء سے 2018ء تک عالمی مارکیٹ میں تیل کی قیمتوں میں کمی کا فائدہ عوام کو منتقل نہیں ہوا تھا‘ چین پاکستان اقتصادی راہداری کے دائرہ اثر اور بنیاد کو مضبوط اور اسے پھیلانے پر توجہ مبذول کی ہے وفاقی وزیر منصوبہ بندی‘ ترقی و اصلاحات مخدوم خسرو بختیار کا قومی اسمبلی میں ضمنی مالیاتی بل پر بحث

پیر 1 اکتوبر 2018 23:18

اسلام آباد ۔ یکم اکتوبر (اُردو پوائنٹ اخبارتازہ ترین - اے پی پی۔ 01 اکتوبر2018ء) وفاقی وزیر منصوبہ بندی‘ ترقی اصلاحات مخدوم خسرو بختیار نے کہا ہے کہ ضمنی مالیاتی بل کا بنیادی مقصد مالی سال 2018-19ء کے لئے مرتب کئے جانے والے بجٹ کی سمت کو درست کرنا ہے‘ وزیراعظم عمران خان کی قیادت میں ملک کی سمت درست کرنے کی کوشش کر رہے ہیں‘ 2013ء سے 2018ء تک عالمی مارکیٹ میں تیل کی قیمتوں میں کمی کا فائدہ عوام کو منتقل نہیں ہوا تھا‘ چین پاکستان اقتصادی راہداری کے دائرہ اثر اور بنیاد کو مضبوط اور اسے پھیلانے پر توجہ مبذول کی ہے۔

پیر کو قومی اسمبلی میں ضمنی مالیاتی بل پر بحث میں حصہ لیتے ہوئے وفاقی وزیر مخدوم خسرو بختیار نے کہا کہ مسلم لیگ (ن) اور پیپلز پارٹی کی جانب سے تجربے کا دعویٰ کیا جارہا ہے لیکن میں ہائوس کے سامنے ایسے حقائق رکھوں گا جو اہلیت اور کارکردگی پر سوالات پیدا کرتے ہیں۔

(جاری ہے)

انہوں نے کہا کہ تحریک انصاف کی حکومت ضمنی مالیاتی بل کے ذریعے بجٹ کی تصحیح کر رہے ہیں۔

مسلم لیگ (ن) نے جو بجٹ تیار کیا تھا اس میں جی ڈی پی کا خسارہ 6.6 فیصد دکھایا گیا تھا‘اگر ہم تصحیح نہ کرتے تو 7 فیصد سے اوپر چلا جاتا۔ اسی طرح حسابات جاریہ کا خسارہ 18 ارب ڈالر ہے۔ قابل غور ہے اگر یہ اس اعداد و شمار کی تردید کریں تو میں اپنا بیان واپس لے لوں گا۔ انہوں نے کہا کہ آج پاکستان کا سب سے بڑا مسئلہ گردشی قرضہ ہے۔ پانچ سال پہلے یہ 583 ارب تھا‘ آج ایک کھرب اور 200 ارب ہے۔

کارکردگی اور اہلیت دیکھیں کہ خسارے کو پبلک ہولڈنگ کمپنی بنا کر قابو پانے کی کوشش کی گئی‘ جو صارفین بل دے رہے تھے ان سے پانچ سالوں میں 110 ارب روپے اکٹھے کئے گئے تاہم اصل مسئلہ پر توجہ نہ دی گئی کہ پاکستان کے اندر مربوط پاور جنریشن کی ضرورت ہے۔ 1985ء میں ملک میں پانی سے کل بجلی کی پیداوار کا 62 فیصد حاصل کیا جاتا تھا۔ آج پانی سے 26 فیصد بجلی کی پیداوار حاصل کی جارہی ہے۔

ہمارے لئے یہ ایک نیا موقع ہے کہ ہم پاکستان اور اس کی معیشت کی سمت کو درست کریں۔ کیا یہ حقیقت نہیں ہے کہ پانچ سال پہلے قومی کارپوریشنوں کا خسارہ 500 ارب تھا۔ پانچ سال بعد ایک کھرب ہوگیا ہے۔ اسی طرح معیشت میں گروتھ کے جو اعداد و شمار دیئے گئے ہیں وہ درست نہیں ہیں۔ معیشت میں مصنوعی گروتھ آئی تھی۔ قرضے لے کر ترقیاتی پروگرام چلائے گئے اور یہ نہ دیکھا کہ اس کا بوجھ عوام پر پڑے گا۔

پچھلے تین سالوں سے دعوئوں کے برعکس ملک میں نجی سرمایہ کاری میں کمی ہوئی ہے حالانکہ یہ لوگ دعویٰ کرتے تھے کہ سرمایہ کار ان پر اعتماد کرتے ہیں۔ اسی طرح کمرشل بنکوں سے قرضوں کا حجم کم ہوگیا کیونکہ غیر ضروری منصوبوں کو سیاسی بنیادوں پر تشکیل دیا گیا۔ مسلم لیگ (ن) کی حکومت کی خوش قسمتی تھی کہ اس وقت عالمی مارکیٹ میں تیل کی قیمتیں کم تھیں اس سے جو بچت ہوئی اس کا کوئی پتہ نہیں چل رہا۔

وفاقی وزیر نے کہا کہ عمران خان سے قوم کی امیدیں وابستہ ہیں۔ قوم نے عمران خان پر اعتماد کا اظہار کیا ہے۔ انشاء اللہ ہم مل کر قوم کی سمت درست کریں گے۔ انہوں نے کہا کہ پی ایس ڈی پی میں کٹوتی پر تنقید کی جارہی ہے لیکن یہ حقیقت بھول جاتے ہیں کہ 2017-18ء میں پی ایس ڈی پی کا جو حجم دیا گیا تھا مالی سال کے اختتام پر وہ پورا نہیں ہوا تھا۔ انہوں نے کہا کہ اگر چیلنجوں کا سامنا کرنا ہے تو پھر منصوبہ بندی کو مدنظر رکھنا ہوگا۔

مسلم لیگ (ن) نے جاری مالی سال کے لئے جو بجٹ ترتیب دیا تھا ان میں سے 450 سکیموں میں سے 343 سکیموں کی منظوری نہیں لی گئی تھی۔ اگر اس کی تصحیح نہ ہوتی تو اس پر دو کھرب روپے لگنے تھے جبکہ مختص رقم 55 ارب روپے تھے۔ یہ غلط منصوبہ بندی تھی۔ وفاقی وزیر نے کہا کہ سی پیک کے لئے گیم چینجر کا لفظ درست ہے ۔ پاکستان اور چین کے درمیان سٹریٹجک تعلقات کا آغاز ایوب خان کے دور سے شروع ہوا۔

دونوں ممالک کے درمیان بہترین سٹریٹجک تعلقات قائم ہیں۔ تحریک انصاف کی حکومت کے قیام کے بعد ہم نے سی پیک کے تحت منصوبوں کا تجزیہ کیا اور اس بات پر اتفاق کیا گیا ہے کہ اس کے دائرہ کار اور بنیاد کو توسیع دی جائے گی۔ اس ضمن میں اپنے چینی ہم منصب سے بھی ملاقات ہوئی ہے اور ان سے سی پیک کے دائرہ کار کو توسیع دینے پر اتفاق رائے کیا گیا ہے۔

انہوں نے کہا کہ حکومت نے آتے ہی دو اہم فیصلے کئے ہیں ایک سی پیک میں تیسرے ملک کو شامل کیا جائے۔ اس کے علاوہ ایک سماجی اقتصادی ترقی کا فوکل گروپ بنایا ہے۔ سی پیک میں گوادر پر کوئی توجہ نہیں دی گئی۔ گوادر میں پینے کا صاف پانی نہیں‘ بجلی نہیں‘ ہم اس پر خصوصی توجہ دیں گے۔ آئل سٹی کو فروغ دیں گے۔ سی پیک میں اقتصادی زونز پر توجہ دینی چاہیے تھی۔ ابھی تک ایک اکنامک زون فعال نہیں ہو سکا۔ ہمیں اپنی ترجیحات پر توجہ مرکوز کرنی چاہیے تھیں۔ اگر ریلوے پر توجہ دیتے تو کراچی سے پشاور مال برداری اور تیز ترین سروس ہوتی۔ ہم اس کو بی او ٹی پر لے جانا چاہتے ہیں۔ انہوں نے کہا کہ پاکستان کے مسائل کا قلیل المدتی حل نہیں اس پر توجہ مرکوز کرنا ہوگی۔