اکشے کمار کو فلم ’’مشن منگل ‘‘ میں کاسٹ کر لیاگیا

اکشے کمار کیساتھ ودیا بالن، نتھیا مینن، سوناکشی ، تپسی پتو اور شرمن جوشی کام کرتے نظر آئیں گے

بدھ 7 نومبر 2018 11:00

اکشے کمار کو فلم ’’مشن منگل ‘‘ میں کاسٹ کر لیاگیا

ممبئی (اُردو پوائنٹ اخبارتازہ ترین - این این آئی۔ 07 نومبر2018ء) اب بولی وڈ انڈسٹری اپنی فلموں کی کہانیوں کے لیے دنیا کے ساتھ ساتھ خلاء پر بھی نظر رکھی ہوئی ہے۔حال ہی میں اداکار شاہ رخ خان نے فلم’ ’سارے جہاں سے اچھا‘‘ میں خلاباز بننے کی حامی دی، وہیں اب بولی وڈ کھلاڑی اکشے کمار نے بھی ایسی ہی ایک فلم میں کام کرنے کا فیصلہ کرلیا ہے۔اکشے کمار کو بھارت کے پہلے مریخ پر جانے کے مشن پر مبنی فلم میں کاسٹ کرلیا گیا ہے۔

اس خبر کا اعلان اداکار نے خود اپنے ٹوئٹر اکاؤنٹ پر کیا۔

(جاری ہے)

اس فلم کا نام’ ’مشن منگل‘‘ ہوگا، جس کی ہدایات جگن شکتی دیں گے، جبکہ آر بالکی پروڈکشن کریں گے۔اکشے کمار نے اپنی ٹویٹ میں فلم کی کاسٹ کی تصویر بھی ریلیز کردی۔اس فلم میں اکشے کمار کے ساتھ ودیا بالن، نتھیا مینن، سوناکشی سنہا، تپسی پتو اور شرمن جوشی کام کرتے نظر آئیں گے۔مشن منگل کی شوٹنگ رواں ماہ ہی شروع ہوگی، جبکہ اکشے اس فلم میں کیا کردار ادا کریں گے یہ بات اب تک سامنے نہیں آئی۔خیال رہے کہ اکشے کمار نے فاکس اسٹار اسٹوڈیوز کے ساتھ تین فلمیں کرنے کا معاہدہ کیا تھا اور ’مشن منگل‘ ان ہی میں سے ایک فلم ہے۔یاد رہے کہ اکشے کمار 2006 میں ریلیز ہونے والی فلم ’جان من’ میں خلاباز کا کردار ادا کرچکے ہیں۔