پاکستانی ٹیم ہاکی ورلڈ کپ میں شرکت کیلئے براستہ واہگہ بھارت پہنچ گئی ،میگا ایونٹ 28نومبر سے شروع ہوگا

لاہور(اُردو پوائنٹ اخبارتازہ ترین - این این آئی۔ 24 نومبر2018ء) پاکستانی ٹیم ہاکی ورلڈ کپ میں فتح کا عزم لئے براستہ واہگہ بارڈر بھارت پہنچ گئی ،میگا ایونٹ 28نومبر سے بھارتی شہر بھوبینشیور میں شروع ہوگا، پاکستانی ٹیم اپنا پہلا میچ یکم دسمبر کو جرمنی کے خلاف کھیلے گی۔ورلڈ کپ میں حصہ لینے کے لئے پاکستانی ٹیم کے کھلاڑی اور آفیشلز نیشنل اسٹیڈیم لاہور پہنچے جہاں سے انہیں سخت سکیورٹی میں واہگہ بارڈر لے جایا گیا ۔

عالمی کپ میں محمد رضوان سینئر ٹیم کی قیادت کریں گے جبکہ دیگر کھلاڑیوں میں عمران بٹ، مظہر عباس، عرفان سینئر ، علیم بلال، مبشر علی، محمد توثیق ارشد، تصور عباس، راشد محمود، اعجاز احمد، عماد شکیل بٹ، محمد عرفان جونیئر، علی شان، فیصل قادر، ابوبکر محمود، عمر بھٹہ، محمد عتیق ارشد اور محمد زبیر شامل ہیں۔

(جاری ہے)

توقیر ڈار ہیڈ کوچ ، حسن سردار ٹیم منیجر، ریحان بٹ، دانش کلیم کوچز، ندیم لودھی اور وقاص محمود فزیوتھراپسٹ کے طور پر فرائض سر انجام دیں گے۔

روانگی سے قبل گفتگو کرتے ہیڈ کوچ توقیر ڈار نے کہا کہ تمام کھلاڑی بھارت میں کھیلے جانے والے میگا ایونٹ میں کارکردگی دکھا کر سبز ہلالی پرچم لہرانے کیلئے پر عزم ہیں ۔جب کھلاڑی مینجمنٹ سے خوش ہوتے ہیں تو میدان میں بھی اچھا پرفارم کرتے ہیں۔پاکستان کی ٹیم ایک سرپرائز پیکیج ہے اور ایونٹ میں سرپرائز دینے کی صلاحیت رکھتی ہے۔ انہوں نے کہا کہ رینکنگ کو نہ دیکھا جائے ،کھلاڑیوں کا عزم ہے کہ ہم نے کارکردگی دکھانی ہے ۔

انہوںنے کہا کہ ہم بھارت جا رہے ہیں اور بہت محتاط ہیں ۔ہم نے اپنی طرف سے پوری ایمانداری سے سلیکشن کی ہے اور اس ایونٹ میں ہمارا ہر کھلاڑی خطرناک ثابت ہو گا۔ٹیم منیجر حسن سردار نے قوم سے سپورٹ اور دعائوں کی اپیل کرتے ہوئے کہا کہ تمام کھلاڑی متحد اور بہترین کارکردگی دکھانے کے لئے بیتاب ہیں اور اپنی قوم کو مایوس نہیں کریں گے۔یکم دسمبر کو جرمنی سے پہلا میچ ہے ،ورلڈ کپ میں ہمارا ڈیتھ پول کہلاتا ہے، اس گروپ میں 9 بار کی عالمی چمپئن ٹیمیں شامل ہیں ،کھلاریوں نے اچھی پریکٹس کی ہے اور ہم اٹیکنگ گیم کھلیں ۔

پاکستان ہاکی ٹیم کے کپتان رضوان سینئر نے کہا کہ یہ ورلڈ کب میرا آخری ثابت ہوسکتا ہے عالمی کپ کو یادگار بنانا چاہتا ہوں۔تمام کھلاڑیوں نے بھرپور تیاری کی ہے اور بہترین نتائج دینے کی کوشش کریں گے ۔ انہوں نے کہا کہ ٹیم کا مورال بلند ہے اور تمام کھلاڑی اپنی اپنی ذمہ داری نبھائیں گے۔انہوںنے کہا کہ کوچز نے بڑی محنت کی ہے اور بھارت میں ملک کا نام روشن کرنے کے لیے پرامید ہیں ۔ انہوںنے کہا کہ کوئی بھی ٹیم کمزور نہیں ہے اور بہترین کھیل پیش کرنے والی ٹیم فتح کی حق دار ٹھہرے گی ۔