پاکستان کرکٹ بورڈ کے مینیجنگ ڈائریکٹر کیلئے 9 امیدواروں کو شارٹ لسٹ ،ْ انٹرویوز کا سلسلہ پیر یا منگل سے شروع ہوگا

مالی معاملات طے ہونے کے بعد گورننگ بورڈ ممبران کی حمایت سے ایک امیدوار کا تقرر کیا جائے گا ،ْ ذرائع

ہفتہ 24 نومبر 2018 14:26

لاہور(اُردو پوائنٹ اخبارتازہ ترین - این این آئی۔ 24 نومبر2018ء) پاکستان کرکٹ بورڈ کے مینیجنگ ڈائریکٹر کیلئے 9 امیدواروں کو شارٹ لسٹ کرلیاگیا ہے جن کے انٹرویوز کا سلسلہ پیر یا منگل سے شروع ہوگا۔میڈیا رپورٹ کے مطابق پاکستان کرکٹ بورڈ کے مینیجنگ ڈائریکٹر کے لیے مجموعی طورپر 150 کے قریب درخواستیں موصول ہوئی تھیں جن میں سے 9 مطلوبہ قابلیت اور معیار پر پورا اترسکے ہیں، جن کے انٹرویوز کا سلسلہ پیر یا منگل سے شروع ہوگا۔

اسد علی خان، جاوید ضیا اور ایک ایچ آر کے نمائندے پر مشتمل پی سی بی کی 3 رکنی کمیٹی موزوں 2 سے 3 امیدوار کا چناؤ کرکے اپنی سفارشات چیئرمین پی سی بی کودیں گے۔ مالی معاملات طے ہونے کے بعد گورننگ بورڈ ممبران کی حمایت سے ایک امیدوار کا تقرر کیا جائے گا۔

(جاری ہے)

ذرائع کے مطابق گورننگ بورڈ ممبران کو ایم ڈی کی تعیناتی کے سلسلے میں ایک سرکلر بھجوایا گیا تھاجس کے تحت انہوں نے اس کی منظوری دے دی ہے، اگلے مرحلے میں آئین میں ترامیم کی جائے گی۔

بورڈ سربراہ احسان مانی اپنے متعدد بیانات میں ایم ڈی کی تقرری کو لازمی قرار دے چکے ہیں ،ْان کا موقف ہے کہ ماضی میں تمام اختیارات کا سرچشمہ بورڈ سربراہ تھا تاہم اب ایسانہیں ہوگا، چیئرمین کے زیادہ تر اختیارات ایم ڈی استعمال کریگاجس سے بورڈ کے معاملات التوا کا شکارنہیں ہوں گے ،ْ چیف آپریٹنگ آفیسر کی اپنی اہمیت برقرار رہے گی۔