وزیرصحت پنجاب نے غیر حاضری پرایم ایس قصورپتوکی ہسپتال کومعطل کردیا ،

لاہور (اُردو پوائنٹ اخبارتازہ ترین - این این آئی۔ 02 فروری2019ء) وزیرصحت پنجاب ڈاکٹریاسمین راشدنے غیر حاضری پرایم ایس قصورپتوکی ہسپتال ڈاکٹرافضل بشیرکومعطل کردیا جبکہ ضلع اوکاڑہ میں موبائل ہسپتال فوری فعال کرنے کا حکم دے دیا۔انہوں نے یہ احکامات اچانک دوروں کے دوران جاری کیے ۔ صوبائی وزیرصحت پنجاب ڈاکٹریاسمین راشدصبح سویرے مریضوں اورلواحقین کودی جانے والی سہولیات کاجائزہ لینے کیلئے اچانک قصورپتوکی ہسپتال پہنچ گئیں جہاں انہوں نے غیر حاضری پرایم ایس قصورپتوکی ہسپتال ڈاکٹرافضل بشیرکومعطل کردیا ۔

انہوں نے مختلف شعبہ جات میں مریضوں کی عیادت اورلواحقین سے دی جانے والی سہولیات کے بارے دریافت کیا۔صوبائی وزیرصحت پنجاب نے ہسپتال میں صفائی ستھرائی، ایمرجنسی وارڈ، لیبرروم، ویٹنگ روم ودیگرشعبہ جات کا بھی دورہ کرکے انتظامات کاجائزہ لیا۔

(جاری ہے)

یاسمین راشد نے کہا کہ ہسپتالوں میں مریضوں کوبہترین طبی سہولیات اورلواحقین کومددرگارماحول کی فراہمی میں کسی قسم کی کوتاہی برداشت نہیں کی جائے گی،صوبہ بھرکے مختلف ہسپتالوں کااچانک دورہ کرکے مریضوں اورلواحقین کیلئے دی جانے والی سہولیات کاجائزہ لیاجائے گا۔

انہوں نے کہا کہ مریضوں کوہسپتالوں میں بہترین بنیادی طبی سہولیات دیناحکومت کی اولین ترجیح اورذمہ داری ہے۔ علاوہ ازیں صوبائی وزیر صحت پنجاب ڈاکٹر یاسمین راشد نے ڈی ایچ کیو اوکاڑہ میں مریضوں کو دی جانے والی طبی سہولیات کا جائزہ لینے کے لئے اچانک دورہ کیا ۔ صوبائی وزیر انسانی حقوق و اقلیتی امور اعجاز عالم آگسٹن ،ایم ایس رائے نیاز ، ڈی سی مریم خان ، سی ای او ڈاکٹر عبدلمجید اور چوہدری طارق ارشاد بھی موقع پر موجود تھے ۔

صوبائی وزیر صحت پنجاب ڈاکٹر یاسمین راشد نے اوکاڑہ ڈی ایچ کیو میں ایمرجنسی ، لیبر روم ، سرجیکل وارڈ ، آپریشن تھیٹر اور پناہ گاہ کا دورہ کرکے طبی سہولیات او ر صفائی ستھرائی کا جائزہ لیا۔اس موقع پر یاسمین راشد نے کہا کہ صوبہ بھر کے ہسپتالو ں میں مریضوں کو معیاری طبی سروس دینے کیلئے جلد خالی سیٹوں پر ڈاکٹرز کی تعیناتی کردی جائے گی۔

وزیراعظم پاکستان عمران خان کی ہیلتھ دوست پالیسی کے تحت شعبہ صحت کے لئے چار ارب روپے سے زائد کے فنڈز مختص کئے گئے ہیں،پنجاب بھر کے ہسپتالوں میں مریضوں کو بہترین طبی سہولیات کی فراہمی کو یقینی بنانے کے لئے دن رات کوشاں ہیں ،تمام ہسپتالو ں میں مریضوں کے علاج معالجہ کے لئے مفت ادویات کی فراہمی کو ہر صورت یقینی بنایاجائے ۔ انہوں نے کہا کہ صوبہ بھر کے تمام ہسپتالو ں میں بڑے شہروں کی طرح معیاری طبی سہولیات کے یکساں معیار کو یقینی بنانے کیلئے جلد ہیلتھ پالیسی کا اعلان کیاجائے گا ،ہیلتھ پالیسی کے تحت پنجاب کے 36 اضلاع میں ہیلتھ کارڈز کے ذریعے ساڑھے تین لاکھ روپے تک کے مفت علاج کی سہولت دی جائے گی ۔