سابق حکمرانوں نے غریب قوم کو قرضوں کے بوجھ تلے دبایااور ان گنت مسائل سے دوچار کیا ‘میاں اسلم اقبال

کاروبار میں آسانیاں پیدا کرنے کیلئے ٹیکسوں کے نظام میں اصلاحات لارہے ہیں، وفاقی اور صوبائی ٹیکسوں کو ایک ہی فارم پر لایاجائیگا معیشت مشکلات سے نکل کر تیزی سے استحکام کی طرف بڑھ رہی ہے، جلد گروتھ کی طرف بھی جائے گی ‘وزیر مملکت ریونیو حماد اظہر

ہفتہ 16 فروری 2019 16:32

سابق حکمرانوں نے غریب قوم کو قرضوں کے بوجھ تلے دبایااور ان گنت مسائل ..
لاہور (اُردو پوائنٹ اخبارتازہ ترین - این این آئی۔ 16 فروری2019ء) زیر مملکت برائے ریونیو حماد اظہر اور صوبائی وزیر صنعت و تجارت میاں اسلم اقبال نے حلقہ این اے 126میں تقریبا 2 کروڑ روپے کے بجلی کے ترقیاتی منصوبوں کا افتتاح کیا - وزراء نے ظفر کالونی ، ڈھولن وال اور سید پور میں ترقیاتی منصوبوں کا افتتاح کیا- صوبائی وزیر صنعت و تجارت میاں اسلم اقبال نے میڈیا کے نمائندوں سے گفتگو کرتے ہوئے کہاکہ وزیراعظم عمران خان کی دیانتداری کی وجہ سے دوست ممالک سے پاکستان کو امداد ملی ہے اور وہ یہاں سرمایہ کاری کررہے ہیں - سابق حکمرانوں نے غریب قوم کو قرضوں کے بوجھ تلے دبایااور ان گنت مسائل سے دوچار کیا - اب ملک میں حکمران بدلے ہیں جو نیک نیتی سے عوام کی ترقی و خوشحالی کے لئے کام کررہے ہیں - ہماری حکومت میں کوئی احتساب الرحمن نہیں جو قطر میں بیٹھ کر ایل این جی کے ٹھیکے کرائے -ہماری حکومت نے ملک میں شفافیت کے کلچر کو فروغ دیاہے اور یہی وجہ ہے کہ اب تک کسی وفاقی یا صوبائی وزیر کا کوئی کرپشن سکینڈل سامنے نہیں آیاکیونکہ ہم عوام کی عدالت میں جوابدہ ہیں-انہوںنے کہاکہ سعودی ولی عہد کے حالیہ دورے سے پاکستان میں اربوں ڈالر کی نئی سرمایہ کاری آئے گی - پنجاب حکومت نے کاروبار میں آسانیاں پیدا کرنے کے حوالے سے زبردست پالیسی دی ہے - ٹیکسوں کے نظام میں اصلاحات لارہے ہیں- وفاقی اور صوبائی ٹیکسوں کو ایک ہی فارم پر لایاجائے گا- انسپکٹر لیس رجیم بھی متعارف کرایاجارہاہے جس سے کوئی انسپکٹر انسپکشن کے نام صنعت کاروں کو تنگ نہیں کرسکے گا -صوبائی وزیر نے کہاکہ وفاقی وزیر خزانہ اسد عمر کی صدارت میں اقتصادی رابطہ کمیٹی کے اجلاس میں فیصلہ ہوچکا ہے کہ آئندہ صوبائی حکومتیں سپیشل اکنامک زونز بنائیں گی جبکہ وفاقی حکومت یہاں گیس اور بجلی کی سہولتیں فراہم کرے گی اور انکم ٹیکس میں دس سال کی چھوٹ بھی دی جائے گی -وزیر مملکت برائے ریونیو حماد اظہر نے میڈیا سے گفتگو کرتے ہوئے کہاکہ حلقہ این اے 126 میں پہلے مرحلے میں دو کروڑ روپے کی لاگت سے بجلی کے ترقیاتی منصوبے مکمل کئے جارہے ہیں جبکہ دوسرے مرحلے میں 10 کروڑ روپے کے ترقیاتی منصوبے مکمل کریں گے - انسولیٹر تبدیل کئے جارہے ہیں جس سے حادثات سے بچاؤ ممکن ہوگا - بکھری ہوئی تاروں کو بھی درست کیاجارہاہے - انہوںنے کہاکہ ہماری حکومت کو خسارے ورثے میں ملے ہیں تاہم وزیراعظم عمران خان کی قیادت میں معیشت کو مضبوط بنیادوں پر استوار کرنے کے لئے تیز رفتاری سے آگے بڑھ رہے ہیں - انہوں نے کہاکہ دوست ممالک سے امداد وزیراعظم عمران خان کی کریڈیبلٹی کی وجہ سے ملی ہے - پاکستان کی معیشت مشکلات سے نکل کر تیزی سے استحکام کی طرف بڑھ رہی ہے اور بہت جلد گروتھ کی طرف بھی جائے گی -انہو ںنے کہاکہ امسال ہمارا ریونیو گروتھ تین سے چار فیصد زیادہ ہوا ہے ۔