اسلام آباد میں بارش اور ملک کے بالائی علاقوں میں برفباری کے باعث پھر موسم کی شدت میں اضافہ

اسلام آباد(اُردو پوائنٹ اخبارتازہ ترین - این این آئی۔ 02 مارچ2019ء) آزاد کشمیر ، گلگت بلتستان اور وفاقی دارالحکومت اسلام آباد میں بارش اور ملک کے بالائی علاقوں میں برفباری کے باعث ایک بار پھر موسم کی شدت میں اضافہ ہوگیا ،مارچ کے پہلے ہفتے تک ملک کے بیشتر علاقوں میں برفباری اور بارش کا سلسلہ جاری رہے گا۔محکمہ موسمیات کے مطابق شہر قائد میں شمال مشرق سے 8 کلو میٹر فی گھنٹہ رفتار سے ہوائیں چلتی رہیں جس میں نمی کا تناسب 56 فیصد رہا، شہر کا کم سے کم درجہ حرارت 17.5 ڈگری سینٹی گریڈ ریکارڈ کیا گیا ۔

محکمہ موسمیات نے کراچی میں آئندہ 24 گھنٹوں کے دوران مطلع جزوی ابر آلود رہنے کا امکان ہے۔ادھر حیدرآباد، میرپورخاص، لاڑکانہ، نواب شاہ، سکھر، مکران، کوئٹہ، سبی اور نصیرآباد میں بھی موسلا دھار بارش متوقع ہے۔

(جاری ہے)

دوسری جانب ڈیرہ اسماعیل خان، ایبٹ آباد، سوات، گوجرہ اور سرگودھا ، اسلام آباد اور آزاد کشمیر اور گلگت بلتستان سمیت مختلف علاقوں میں میں وقفے وقفے سے بارشوں کا سلسلہ جاری رہا ،سرگودھا میں بارش کے باعث بیشتر علاقوں میں بجلی غائب رہی جس کی وجہ سے شہریوں کو پریشانی کا سامنا کر ناپڑا۔

وادی کوئٹہ سمیت گلیات، کالام، مالم جبہ اور مری میں تیز برفباری کا سلسلہ جاری رہا جس سے سردی کی شدت میں اضافہ ہوگیا ہے۔مری میں شدید برفباری سے اب تک 10 انچ تک برف پڑچکی ہے ،کان مہترزئی میں برف باری کے باعث کوئٹہ ڑوب شاہراہ بند کردی گئی ہے۔محکمہ موسمیات کے مطابق مارچ کے پہلے ہفتے تک ملک کے بیشتر علاقوں میں برفباری اور بارش کا سلسلہ جاری رہے گا۔