اسلام آباد ہائی کورٹ کا صفا گولڈ مال کرپشن ریفرنس میں شریک ملزم کی ضمانت کی درخواست پر سپریم کورٹ کی آرڈر کی کاپی فراہم کر نے کاحکم

بدھ 6 مارچ 2019 16:48

اسلام آباد (اُردو پوائنٹ اخبارتازہ ترین - این این آئی۔ 06 مارچ2019ء) اسلام آباد ہائی کورٹ نے صفا گولڈ مال کرپشن ریفرنس میں شریک ملزم کی ضمانت کی درخواست پر سپریم کورٹ کی آرڈر کی کاپی فراہم کر نے کاحکم دیا ہے ۔ اسلام آباد ہائی کورٹ میں صفا گولڈ مال کرپشن ریفرنس کے ملزمان کی 265 کے کی درخواست پر سماعت اسلام آباد ہائیکورٹ کے ڈویژن بینچ نے کی۔

ڈویژن بینچ میں چیف جسٹس اطہر من اللہ اور جسٹس میاں گل اورنگزیب شامل تھے۔

(جاری ہے)

7 شریک ملزمان نے ضمانت کے لئے درخواست دائر کر رکھی ہیں۔وکیل درخواست گزار نے کہاکہ سپریم کورٹ نے صفا گولڈ مال کے شریک ملزم عبدالقیوم کی ضمانت کی درخواست منظور کر رکھی ہے۔ وکیل درخواست گزار نے کہاکہ میرے موکل کی ضمانت کی درخواست منظور کی جائے۔ عدالت نے استفسار کیا کہ سپریم کورٹ کے آڈر کی کاپی آپ کے پاس ہے۔وکیل درخواست گزار نے کہا کہ آئندہ سماعت پر سپریم کورٹ کا تفصیلی یا شارٹ آرڈر فراہم کروں گاجس کے بعد عدالت نے حکم دیاکہ سپریم کورٹ کی آڈر کی کاپی عدالت کو فراہم کریں۔بعد ازاں کیس کی مزید سماعت 13 مارچ تک ملتوی کردی گئی ۔