Live Updates

حالیہ سیلاب کو بھارتی آبی جارحیت نہیں کہہ سکتا، وزیر دفاع

جمعرات 28 اگست 2025 19:44

اسلام آباد (اُردو پوائنٹ اخبارتازہ ترین - این این آئی۔ 28 اگست2025ء) وزیر دفاع خواجہ آصف نے کہا ہے کہ حالیہ سیلاب کو بھارتی آبی جارحیت نہیں کہہ سکتا ،بھارت نے پروٹوکول کے مطابق دوبار سیلاب کی پیشگی اطلاع دی۔نجی ٹی وی کے مطابق خصوصی گفتگو میں خواجہ آصف نے کہا کہ بھارت نے سیلاب سے متعلق 2 بار اطلاع دی ہے بھارت ہمیشہ سے ہی سیلاب کی پیشگی اطلاع دیتا رہا ہے بھارت بعض اوقات عین سیلاب کے وقت وارننگ دیتا ہے۔

خواجہ آصف نے کہا کہ سیلابی ریلوں سے متعلق بھارت کی شرارت کے کوئی ثبوت نہیں ،بھارت نے اس بار ڈیم سے پانی ریلیز کرنے کے بعد بھی بتایا، ہم بھی ڈیم سے پانی ریلیز کرتے ہیں اگر نہ کریں تو آبادی کو خطرہ ہوتا ہے۔انہوںنے کہاکہ شہری آبادی میں 50 سال بعد اس طرح کی شدید بارش ہوئی ہے ،ہمارے ہاں آبی گزرگاہوں پر تجاوزات بہت زیادہ ہیں، سیالکوٹ کے وسط سے گزرنے والے نالے پر تجاوزات ہیں ان کے دونوں طرف فیکٹریاں ہیں، دریاؤں اور نالوں کے کنارے پر تجاوزات نہیں ہونی چاہیے ،اگر چاہیں تو تجاوزات 3 دن میں ختم کر سکتے ہیں، شہری آبادی میں تجاوزات کے خاتمے کیلئے سروے شروع کر رہے ہیں۔

(جاری ہے)

وزیر دفاع نے کہا کہ سرکاری زمین پر پیشہ ور لوگ غیرقانونی تعمیرات کرتے ہیں ،سرکاری زمینوں کی لوٹ مار لگی ہوئی ہے ،ہر کوئی قبضہ کرلیتا ہے بارشوں کے بعد تجاوزات کیخلاف کارروائی کی جائے گی۔