آئی جی پنجاب کی سربراہی میں سنٹرل پولیس آفس میں تعزیتی ریفرنس کا انعقاد

ریفرنس میں گذشتہ دو برسوں میں انتقال کرنے والے پولیس افسران کے ایصال ثواب کیلئے فاتحہ خوانی کی گئی

بدھ 7 اگست 2019 18:30

لاہور(اُردو پوائنٹ اخبارتازہ ترین - این این آئی۔ 07 اگست2019ء) انسپکٹر جنرل پولیس پنجاب کیپٹن (ر) عارف نواز خان نے کہا ہے کہ پولیس افسران ایک خاندان کی مانند ہیں جس کی خوشیاں اور غم سانجھے ہیں اور خاندان کا کوئی فرد جب وفات پاجاتا ہے تو اسکی کمی کے دکھ کو پورا خاندان محسوس کرتا ہے کیونکہ ان افسران نے نہ صرف اپنے پیشہ ورانہ کیرئیر ایک دوسرے کے شانہ بشانہ گذارے ہوتے ہیں بلکہ زندگی کے عروج و زوال میں بھی آپس میں قریبی تعلق رکھتے ہیں ، بھرپور محنت ، فرض شناسی اور ایمانداری کے ساتھ سروس پوری کرکے ریٹائرڈ ہونے والے افسران بھی محکمہ پولیس کا قیمتی اثاثہ ہیں ۔

ان خیالات کا اظہار انہوں نے سنٹرل پولیس آفس میں منعقدہ تعزیتی ریفرنس کے دوران خطاب کرتے ہوئے کیا ۔

(جاری ہے)

تعزیتی ریفرنس کا انعقاد گذشتہ دو برسوں میں وفات پاجانے والے پولیس افسران کی یاد میں کیا گیا تھا جس میں ریٹائرڈ پولیس افسران کے علاوہ وفات پانے والے افسران کے اہل خانہ بھی موجود تھے۔دوران ریفرنس مجموعی طور پر 09 پولیس افسران میاں عبدالقیوم ، جاوید قیوم خان ، نصر اللہ خان ، مرزا محمد یٰسین ، چوہدری قمر الزماں ، لونس ڈیل نیبلٹ، میجر (ر) مبشر اللہ، کامران یوسف ملک اور فرخندہ اقبال کی خدمات کو انکے ساتھی افسران نے خراج تحسین پیش کیا جبکہ افسران کے عزیزوں اور اہل خانہ کے دیگر افراد نے بھی اپنے خیالات اور جذبات کا اظہار کیا ۔

ریفرنس میں سابق آئی جیز کی تنظیم کے وائس پریذیڈنٹ خواجہ خالد فاروق نے اظہارخیال کرتے ہوئے کہا کہ آئی جی پنجاب کیپٹن (ر) عارف نواز کی جانب سے مرحوم پولیس افسران کی یاد میں ہونے والا ریفرنس ایک اچھا اقدام ہے کیونکہ ان افسران نے اپنی زندگی کے قیمتی ماہ و سال پولیس سروس میں گذارے ہیں ان کی خدمات کا اعتراف ہر سطح پر ہونا چاہئے ۔ ریفرنس میں ریٹائرڈ افسران بشمول طارق پرویز، تحسین شاہ، افتخار احمد، غالب بندیشہ، طارق کھوسہ، پرویز رحیم راجپوت، شوکت حیات، فیاض میر، سرمد سعید خان، کلبِ عباس، ملک آصف حیات، ظفر عباس لک، احمد نسیم، سید اظہر حسن ندیم اور محمد اعظم جوئیہ کے علاوہ سنٹرل پولیس آفس کے تمام ایڈیشنل آئی جیز، ڈی آئی جیز اور دیگر افسران بھی موجود تھے جبکہ اس موقع پر مرحوم افسران کے ایصال ثواب کیلئے فاتحہ خوانی بھی کی گئی ۔