پشاور میں پاکستان کی پہلی اینڈوسکوپک کارڈیاک سرجری، بغیر سینہ کھولے دل کا کامیاب آپریشن

پشاور انسٹیٹیوٹ آف کارڈیالوجی ملک کا وہ پہلا ادارہ بن گیا جہاں دل کے والو کی تبدیلی اور دل کے سوراخ کا علاج بغیر سینہ چاک کیے اینڈوسکوپک ٹیکنالوجی کے ذریعے کیا گیا

ساجد علی بدھ 13 مئی 2026 16:43

پشاور میں پاکستان کی پہلی اینڈوسکوپک کارڈیاک سرجری، بغیر سینہ کھولے ..

پشاور (اُردو پوائنٹ اخبارتازہ ترین۔ 13 مئی2026ء) پشاور انسٹیٹیوٹ آف کارڈیالوجی نے طب کی دنیا میں ایک عظیم سنگِ میل عبور کرتے ہوئے پاکستان کی پہلی کامیاب اینڈوسکوپک ہارٹ سرجری انجام دے دی۔ تفصیلات کے مطابق پشاور انسٹیٹیوٹ آف کارڈیالوجی ملک کا وہ پہلا ادارہ بن گیا ہے جہاں دل کے والو کی تبدیلی اور دل کے سوراخ کا علاج بغیر سینہ چاک کیے اینڈوسکوپک ٹیکنالوجی کے ذریعے کیا گیا ہے، یہ آپریشن جدید کیمرا معاون ٹیکنالوجی اور جدید جراحی طریقۂ کار کو استعمال کرتے ہوئے انجام دیا گیا، یہ پیچیدہ آپریشن ایک 37 سالہ مریض پر کیا گیا، جو اب تیزی سے صحت یاب ہو رہا ہے۔

پیڈز کارڈیاک سرجن ڈاکٹر مجیب داوڑ کا کہنا ہے کہ اس طریقے میں سینہ مکمل طور پر کھولے بغیر چھوٹے کٹ اور کیمروں کی مدد سے سرجری کی جاتی ہے، اس جدید طریقہ علاج میں مریض کو آپریشن کے بعد انتہائی کم درد ہوتا ہے، دورانِ آپریشن خون کا ضائع ہونا کم سے کم ہوتا ہے، مریض بہت جلد صحت یاب ہو کر اپنی عام زندگی کی طرف لوٹ سکتا ہے۔

(جاری ہے)

پاکستان کی طبی تاریخ میں پشاور انسٹی ٹیوٹ آف کارڈیالوجی کا ایک تاریخی سنگِ میل!

پاکستان میں پہلی کامیاب اینڈوسکوپک ہارٹ سرجری نے جدید طب کے میدان میں ایک نئے دور کا آغاز کر دیا ہے۔ یہ کامیابی نہ صرف ملکی صحت کے نظام کیلئے ایک بڑا اعزاز ہے بلکہ عالمی معیار کی جدید طبی سہولیات کی… pic.twitter.com/NwHf0JZtBO
— Government of KP (@GovernmentKP) May 13, 2026

ادارے کے ڈین پروفیسر ڈاکٹر شاہکار احمد شاہ نے اس کامیابی پر فخر کا اظہار کرتے ہوئے انکشاف کیا کہ پشاور انسٹیٹیوٹ آف کارڈیالوجی اب مستقبل قریب میں دل کی پیوند کاری کا پروگرام شروع کرنے کے لیے بھی تیاریاں کر رہا ہے، ادارے کا مقصد عالمی معیار کا علاج صوبے کے عوام کو ان کی دہلیز پر فراہم کرنا ہے، اس کامیاب تجربے کے بعد پی آئی سی پاکستان میں امراضِ قلب کے جدید، پیچیدہ اور کم تکلیف دہ علاج متعارف کروانے والا صفِ اول کا ادارہ بن گیا، یہ کامیابی بہترین ٹیم ورک اور جدید طبی سہولیات کی دستیابی کا منہ بولتا ثبوت ہے۔