تین دن سے سرحد پر مختلف مقامات پر غیر معمولی نقل و حرکت، بھارت نے جنگ شروع کرنے کی تیاریاں مکمل کر لیں

راولپنڈی (اردوپوائنٹ اخبارتازہ ترین۔24 اگست 2019ء) تین دن سے سرحد پر مختلف مقامات پر غیر معمولی نقل و حرکت، بھارت نے جنگ شروع کرنے کی تیاریاں مکمل کر لیں، عارف حمید بھٹی کا انکشاف کہتے ہیں کہ بھارت لائن آف کنٹرول پر گڑ بڑ کر رہا ہے، کسی بھی قسم کی جارح حرکت پر پاکستان تین گنا زیادہ شدت سے جواب دے گا۔ تفصیلات کے مطابق نجی ٹی وی چینل سے وابستہ معروف صحافی اور تجزیہ کار عارف حمید بھٹی نے انکشاف کیا ہے کہ لائن آف کنٹرول کے مختلف مقامات پر گزشتہ 3 روز کے دوران بھارتی فوج کی غیر معمولی نقل و حرکت دیکھنے میں آئی ہے۔

پاک فوج لائن آف کنٹرول پر مکمل الرٹ ہے اور بھارتی فوج کی نقل و حرکت پر مکمل نظر رکھے ہوئے ہے۔ پاکستان نے بھارت کو پیغام بھی بھیج دیا ہے کہ اگر کسی بھی قسم کی جارحیت دکھائی گئی تو پھر پاکستان تین گنا زیادہ شدت سے اس کا جواب دے گا۔

(جاری ہے)

دوسری جانب ہفتے کے روز آرمی چیف جنرل قمر باجوہ نے فارمیشن ہیڈ کوارٹرز گلگت کا دورہ کیا۔ آرمی چیف نے دورے کے دوران فارمیشن ہیڈ کوارٹرز میں یادگارشہدا پرپھول رکھے اور پھر بعد ازاں فوجی افسران اور جوانوں سے خصوصی خطاب بھی کیا۔

آرمی چیف نے موسمی چیلنجز اور زمینی صورتحال کے باوجود جوانوں، افسروں کی تیاری اور جذبے کو سراہا۔ آرمی چیف کا کہنا تھا کہ دنیاکے بلندترین میدان جنگ میں افسروں، جوانوں کے جذبے کو سراہتے ہیں۔ ہم مشرقی سرحد پر موجود خطرے سے آگاہ ہیں۔ مشرقی سرحد پرخطرے کا تعلق مقبوضہ جموں وکشمیر کی موجودہ صورتحال سے ہے۔ تاہم ہم کسی بھی مس ایڈونچر کو ناکام بنانے کے لیے پوری طرح تیار ہیں۔

ہم نے مقبوضہ کشمیر کی صورتحال پر مکمل نظر رکھی ہوئی ہے۔ بھارت نے اگر کسی بھی قسم کی جارحیت کی کوشش کی تو اسے بھرپور اور منہ توڑ جواب دیا جائے گا۔ ہم طرح کے حملے کا منہ توڑ جواب دینے کی صلاحیت رکھتے ہیں۔ واضح رہے کہ آرمی چیف کی جانب سے فارمیشن ہیڈ کوارٹرز گلگت کا دورہ ایسے موقع پر کیا گیا ہے جب بھارت نے لائن آف کنٹرول پر جارحیت میں اضافہ کر دیا ہے اور سرحدوں پر اپنی فوج میں مسلسل اضافہ کر رہا ہے۔ جبکہ مودی سرکار کے وزراء کی جانب سے بھی مسلسل جنگ کی دھمکیاں دی جا رہی ہیں۔ ایسے میں پاک فوج نے بھارت کو واضح پیغام دے دیا ہے کہ ہم ہر طرح کی جنگ کا مقابلہ کرنے کیلئے تیار ہیں۔