رواں مالی سال قیمتی پتھروں، گڑ اور اس کی مصنوعات اور سیمنٹ کی برآمدات میں اضافہ ہوا ہے، ادارہ شماریات پاکستان

قیمتی پتھروں کی برآمدات میں 84 فیصد کی مصنوعات میں 27.37 فیصد اور سیمنٹ کی برآمدات میں 13.15 فیصد اضافہ ہوا

جمعہ 6 دسمبر 2019 20:15

رواں مالی سال قیمتی پتھروں، گڑ اور اس کی مصنوعات اور سیمنٹ کی برآمدات ..

اسلام آباد ۔ (اُردو پوائنٹ اخبارتازہ ترین - اے پی پی۔ 06 دسمبر2019ء) رواں مالی سال کے دوران قیمتی پتھروں کی برآمدات میں 84 فیصد جبکہ گڑ اور اس کی مصنوعات کی برآمدات میں 27.37 فیصد اور سیمنٹ کی برآمدات میں 13.15 فیصد اضافہ ہوا ہے۔ ادارہ برائے شماریات پاکستان (پی بی ایس) کے اعدادوشمار کے مطابق رواں مالی سال میں جولائی تا اکتوبر 2019ء کے دوران قیمتی پتھروں کی برآمدات 5 میٹرک ٹن تک بڑھ گئیں جن کی مالیت 276 ملین روپے رہی ہے جبکہ گذشتہ مالی سال میں جولائی تا اکتوبر 2018ء کے دوران برآمدات کا حجم ایک میٹرک ٹن جبکہ مالیت 150 ملین روپے رہی تھی۔

اس طرح گذشتہ مالی سال کے مقابلہ میں رواں مالی سال کے پہلے چار ماہ کے دوران قیمتی پتھروں کی ملکی برآمدات میں بالحاظ مالیت 126 ملین روپے یعنی 84 فیصد جبکہ بالحاظ وزن 400 فیصد کا نمایاں اضافہ ریکارڈ کیا گیا ہے۔

(جاری ہے)

پی بی ایس کے مطابق رواں مالی سال کے پہلے چار ماہ کے دوران گڑ اور اس کی مصنوعات کی برآمدات 8304 میٹرک ٹن تک پہنچ گئیں جن کی مالیت 1852 ملین روپے رہی ہے جبکہ گذشتہ مالی سال کے اسی عرصہ کے دوران 1454 ملین روپے کی برآمدات کی گئیں جن کا وزن 7138 میٹرک ٹن رہا تھا۔

اس طرح گذشتہ مالی سال کے پہلے چار ماہ کے مقابلہ میں رواں مالی سال میں جولائی تا اکتوبر 2019ء کے دوران گڑ اور اس کی مصنوعات کی برآمدات میں بالحاظ مالیت 398 ملین روپے یعنی 27.37 فیصد کا اضافہ ہوا ہے تاہم بالحاظ وزن برآمدات میں 16.34 فیصد کا اضافہ ریکارڈ کیا گیا ہے۔ رپورٹ کے مطابق رواں مالی سال میں جولائی تا اکتوبر 2019ء کے دوران سیمنٹ کی برآمدات 14 ہزار 838 ملین روپے تک پہنچ گئیں جبکہ گذشتہ مالی سال میں جولائی تا اکتوبر 2018ء کے دوران برآمدات کا حجم 13 ہزار 113 ملین روپے رہا تھا۔

اس طرح گذشتہ مالی سال کے مقابلہ میں رواں مالی سال کے پہلے چار ماہ کے دوران سیمنٹ کی قومی برآمدات میں 1725 ملین روپے یعنی 13.15 فیصد کا اضافہ ریکارڈ کیا گیا ہے۔ واضح رہے کہ گذشتہ مالی سال کے مقابلہ میں رواں مالی سال کے دوران سیمنٹ کی برآمدات میں بالحاظ وزن 43 ہزار 498 میٹرک ٹن یعنی 1.80 فیصد کی کمی کے باوجود بالحاظ مالیت 13 فیصد سے زیادہ کا اضافہ ریکارڈ کیا گیا ہے۔