پاکستان سپر لیگ میں ٹکٹ کتنے کی ہوگی؟

پی ایس ایل میں پہلی بارہر میچ کی ٹکٹ کی قیمت مختلف رکھنے کا فیصلہ، آئن لائن ٹکٹیں 20 جنوری سے فروخت ہوں گی

احمد طارق اتوار 19 جنوری 2020 17:30

لاہور(اردوپوائنٹ اخبارتازہ ترین 19 جنوری 2020) پاکستان سپر لیگ میں پہلی بارہر میچ کی ٹکٹ کی قیمت مختلف رکھنے کا فیصلہ کیا گیا ہے۔ ذرائع کے مطابق پاکستان کرکٹ بورڈ نے پی ایس ایل سیزن 5 کے ہر میچ کی ٹکٹ مختلف رکھنے کا فیصلہ کیا ہے، تاہم اس حوالے سے مشاورت کا سلسلہ جاری ہے۔ ذرائع نے دعویٰ کیا ہے کہ پاکستان سپر لیگ میں پہلی بار ٹکٹوں کی قیمتوں کا فیصلہ میچ کی نوعیت دیکھ کر کیا جائے گا، جیسا کہ لاہور قلندرز اور کراچی کنگز کے درمیان کھیلے جانے والے میچ کی ٹکٹ کی قیمت سب سے زیادہ ہوگی، کیونکہ پی ایس ایل میں شائقین سب سے زیادہ میچ لاہور قلندرز اور کراچی کنگز کا دیکھنا پسند کرتے ہیں، تاہم ٹکٹوں کی قیمتوں کے حوالے سے ابھی تک کوئی حتمی فیصلہ نہیں ہوا ہے۔

دوسری جانب ذرائع نے دعویٰ کیا ہے کہ کراچی میں شیڈول پی ایس ایل کے افتتاحی میچ کی ٹکٹ کی قیمت 1 ہزار سے لیکر 6 ہزار تک رکھنے کی تجویز زیر غور ہے۔

(جاری ہے)

پاکستان سپر لیگ کے سیزن 5 کے میچز کی آئن لائن ٹکٹیں 20 جنوری سے فروخت ہوں گی۔ واضح رہے کہ وزیراعظم عمران خان کی ہدایت پر پہلی بار پاکستان سپر لیگ (پی ایس ایل) کے تمام میچ پاکستان ہورہے ہیں، لاہور 14، کراچی 9، راولپنڈی 8 اور ملتان 3 میچوں کی میزبانی کرے گا۔

افتتاحی تقریب 20 فروری کو نیشنل اسٹیڈیم کراچی میں ہوگی۔ فائنل 22 مارچ کو لاہور کے قذافی اسٹیڈیم میں ہوگا۔پاکستان کرکٹ بورڈ (پی سی بی) کی خواہش ہے کہ ٹورنامنٹ کے لیے جوش و خروش بڑھایا جائے۔انٹرنیشنل کرکٹ کونسل (آئی سی سی) کی منظور شدہ سیکورٹی کنسلٹنٹ نے چاروں گرائونڈز کی سیکورٹی کو کلیئرنس دے دی ہے۔