وزیراعلیٰ سندھ سے شفقت محمود کی ملاقات ، یکساں نصابِ تعلیم متعارف کرانے کے حوالے سے تبادلہ خیال

جمعرات 27 فروری 2020 19:15

کراچی (اُردو پوائنٹ اخبارتازہ ترین - این این آئی۔ 27 فروری2020ء) وزیر اعلی سندھ سید مراد علی شاہ اور وفاقی وزیر تعلیم شفقت محمود نے جمعرات کو یہاں وزیراعلی ہاؤس میںمنعقدہ اجلاس میں وفاقی وزارت تعلیم کی جانب سے پورے پاکستان میں تیار کردہ یکساں نصابِ تعلیم متعارف کرانے کے حوالے سے تبادلہ خیال کیا۔وزیراعلی نے کہا کہ 18 ویں ترمیم کی منظوری کے بعد اسکول کے نصاب کو ڈیزائن کرنا صوبائی سبجیکٹ ہوگیاہے لیکن وفاقی وزیر تعلیم نے اس مقصد کے ساتھ ہی ایک قدم اٹھایا ہیکہ پورے پاکستان میں یکساں نصاب متعارف کرایا جاسکے۔

انہوں نے انہیں یقین دلایا کہ ان کی حکومت اس منصوبے کی حمایت کرے گی۔وزارت تعلیم کے ذریعہ تیار کردہ نصاب پورے پاکستان کے تمام سرکاری ، نجی اور انگریزی میڈیم اسکولوں میں پڑھایا جائے گا۔

(جاری ہے)

وفاقی وزیر نے وزیر اعلی سندھ کو بتایا کہ انہوں نے مدرسوں کی رجسٹریشن کے لئے وفاقی مدرس اور دیگر متعلقہ علمائے کرام کو اعتماد میں لیا ہے۔ انہوں نے کہا کہ وفاقی حکومت کے تعلیمی منصوبے پر عمل درآمد کی نگرانی کے لئے متعلقہ کمشنرز کے ماتحت ڈویژنل کمیٹیاں تشکیل دی جائیں گی۔

انہوں نے کہا کہ علمائے کرام حکومت کے ساتھ تعاون کر رہے ہیں۔وزیر اعلی سندھ نے کہا کہ ہمارے مدارس کے لوگ امن کے فروغ اور مذہبی نصاب کے ساتھ باضابطہ تعلیم کو متعارف کرانے میں حکومت کا ساتھ دے رہے ہیں۔اس سے قبل وفاقی وزیر تعلیم نے صوبائی وزیر تعلیم سعید غنی کے ساتھ پورے پاکستان میں یکساں نصاب متعارف کروانے سے متعلق تفصیلی ملاقات کی۔