میر رضا قتل کیس: دونوں ہاتھوں پر گن شاٹ ریزیڈیو کی تصدیق

کراچی(اُردو پوائنٹ اخبارتازہ ترین - این این آئی۔ 17 اگست2026ء) نوجوان تاجر میر رضا قتل کیس میں اہم پیش رفت سامنے آئی ہے، جہاں قبر کشائی کے دوران حاصل کیے گئے فرانزک نمونوں کی کیمیکل ایگزامن جانچ مکمل ہونے کے بعد جامعہ کراچی کی کیمیکل ایگزامن لیبارٹری نے رپورٹ پولیس کو فراہم کردی ہے۔تفتیشی ذرائع کے مطابق قبر کشائی کے دوران کیمیکل ایگزامن کے لیے مجموعی طور پر 13 نمونے حاصل کیے گئے تھے، جن میں سے 5 کے نتائج موصول ہوئے ہیں جبکہ دیگر نمونے گلنے سڑنے کے باعث قابلِ تجزیہ نہیں رہے۔

ذرائع کا کہنا ہے کہ رپورٹ میں میر رضا کے دونوں ہاتھوں پر گن شاٹ ریزیڈیو (GSR) کی موجودگی کی تصدیق ہوئی ہے۔ تفتیشی حکام کے مطابق یہ نتیجہ اس امکان کی جانب اشارہ کرتا ہے کہ میر رضا نے فائرنگ کی ہو، تاہم پولیس نے واضح کیا ہے کہ صرف GSR رپورٹ کی بنیاد پر حتمی نتیجہ اخذ نہیں کیا جائے گا اور اسے دیگر شواہد کے ساتھ ملا کر دیکھا جائے گا۔

(جاری ہے)

کیمیکل ایگزامن کے دوران میر رضا کی کمر اور سینے پر بھی گن شاٹ ریزیڈیو کے شواہد ملے ہیں، تاہم ذرائع کے مطابق کمر کے حصے میں GSR کی مقدار سینے کے مقابلے میں زیادہ پائی گئی۔

یہ نتائج میڈیکو لیگل شواہد سے بھی مطابقت رکھتے ہیں، جن میں میر رضا کو کمر کی جانب سے گولی لگنے اور سینے کی سمت سے نکلنے کے شواہد سامنے آئے تھے۔تفتیشی ذرائع کے مطابق اس پہلو کو بھی زیرِ غور رکھا جا رہا ہے کہ ممکنہ طور پر میر رضا نے کسی خطرے کو محسوس کرنے کے بعد دفاع میں فائرنگ کی ہو، تاہم اس بارے میں حتمی رائے قائم نہیں کی گئی۔پولیس حکام اب GSR رپورٹ، پوسٹ مارٹم، جائے وقوعہ سے ملنے والے شواہد، اسلحے سے متعلق فرانزک نتائج اور دیگر تفتیشی مواد کو یکجا کرکے واقعے کی مکمل نوعیت جانچ رہے ہیں۔

واضح رہے کہ ابتدائی پوسٹ مارٹم رپورٹ میں پولیس سرجن نے متعدد فرانزک خامیوں کی نشاندہی کی تھی، جس کے بعد عدالت کے حکم پر میر رضا کی قبر کشائی کرکے دوبارہ میڈیکو لیگل معائنہ کیا گیا۔ ابتدائی رپورٹ میں ہاتھوں سے گن شاٹ ریزیڈیو کے نمونے نہ لیے جانے سمیت دیگر خامیوں کی بھی نشاندہی کی گئی تھی۔قبر کشائی کے بعد مختلف فرانزک نمونے کیمیائی تجزیے کے لیے جامعہ کراچی کی لیبارٹری بھیجے گئے تھے۔

اس سے قبل میر رضا کی شرٹ کے کیمیائی تجزیے میں بھی کمر کی جانب گن شاٹ ریزیڈیو کی موجودگی سامنے آنے کی اطلاع تھی۔تازہ کیمیکل ایگزامن رپورٹ نے میر رضا کیس کی تفتیش میں ایک اہم نیا رخ پیدا کردیا ہے، تاہم پولیس کے مطابق واقعے کی حتمی نوعیت اور فائرنگ کے حالات کا تعین تمام فرانزک اور میڈیکو لیگل شواہد کے مجموعی جائزے کے بعد ہی ممکن ہوگا۔