ملتان میں موسلا دھار بارش، سڑکوں پر پانی جمع ہوگیا

ملتان (اُردو پوائنٹ اخبارتازہ ترین - اے پی پی۔ 04 مارچ2020ء) بدھ کی صبح ملتان میں ہونے والی موسلا دھار بارش سے مختلف علاقوں میں پانی جمع ہوگیا۔ محکمہ موسمیات کے مطابق صبح آٹھ بجے شروع ہونے والی بارش وقفے وقفے سے 11بجے تک جاری رہی۔ ملتان شہر میں 5.6ملی میٹر بارش ریکارڈ کی گئی اور آ ئندہ دوروز کے دوران بھی مزید بارش کا امکان ہے۔ دریں اثناء منیجنگ ڈائریکٹرواسا نسیم خالد چانڈیو کی جانب واسااہلکاروں کو ہائی الرٹ رہنے کا حکم دیاگیاہے جبکہ تمام سیوریج، ڈسپوزل اسٹیشنز ڈویژنوں میں ہنگامی حالت کا اعلان کردیاگیا۔

(جاری ہے)

ایم ڈی واسا کی ہدایات کے مطابق بارش کے رکتے ہی سیوریج ڈویژنوں کے افسران کو ٹیموں،مشینری کے ہمراہ فوری طور پر فیلڈ میں نکلنے کا حکم دیاگیا۔ تمام شاہرائوں اورمیٹرو روٹ سے ہنگامی بنیادوں پر بارش کا پانی نکالنے کی ہدایت دی گئی۔انہوں نے تمام ڈسپوزل سٹیشنوں کو بھی فل کپیسٹی پر چلانے کا حکم دیا ہے جبکہ لوڈ شیڈنگ کی صورت میں ڈسپوزل اسٹیشنز کو جنریٹرز پر چلایا جائے۔انہوں نے کہا کہ شہر بھر سے بارش کی پانی کی نکاسی تک تمام افسران فیلڈ میں اپنی حاضری کو یقینی بنائیں۔انہوں نے کہا کہ نکاسی آب کا آپریشن جلد از جلد شروع کیا جائے تاکہ شہریوں کو آمد و رفت میں دشواری کا سامنا نہ کرنا پڑے۔