ناصر مدنی پر تشدد کرنے والے ملزمان کو گرفتار کر لیا گیا

ابتدائی معلومات کے مطابق مولانا صاحب کو مخالف پیر کے مریدوں نے تشدد کا نشانہ بنایا۔ سلیم صافی کا ٹویٹ

مقدس فاروق اعوان بدھ 18 مارچ 2020 15:15

لاہور (اردو پوائنٹ اخبار تازہ ترین 18 مارچ 2020ء ) ناصر مدنی پر تشدد کرنے والے ملزمان کو گرفتار کر لیا گیا۔تفصیلات کے مطابق گذشتہ روز عالمِ دین علامہ ناصر مدنی کو پروگرام کیلئے بلا کر اغواء کر کے تشدد کا نشانہ بنا یا گیا تھا،ناصر مدنی نے الزام عائد کیا کہ میرے کپڑے اتار کر ویڈیو بنائی گئی اور تشدد کا نشانہ بنایا گیا اور میڈیا پر آنے کی صورت میں شدید دھمکیاں بھی دی گئیں۔

وزیر اعلیٰ پنجاب عثمان بزدار نے مولانا ناصر مدنی پر بہیمانہ تشدد کا نوٹس لیا تھا۔آئی جی پنجاب کو ملزمان کیخلاف سخت کارروائی کی ہدایت کی گئی۔تاہم اب ناصر مدنی پر تشدد کرنے والے ملزمان کو گرفتار کیے جانے کا دعویٰ کیا جا رہا ہے۔سی ایم پنجاب اپڈیٹس کے ٹویٹر اکاؤنٹ کے مطابق علامہ ناصر مدنی پر تشدد کے واقعے پر وزیراعلیٰ پنجاب سردار عثمان بزدار کے نوٹس پر پولیس نے فوری ایکشن لیتے ہوئے تشدد کے ذمہ دار ملزمان کو گرفتار کر لیا ہے۔

(جاری ہے)

ملزمان کے خلاف مقدمہ درج کرکے مزید قانونی کارروائی شروع کر دی گئی ہے۔

علامہ ناصر مدنی پر تشدد کا واقعہ، وزیراعلیٰ پنجاب سردار عثمان بزدار کے نوٹس پر پولیس کا فوری ایکشن
تشدد کے ذمہ دار ملزمان کو پولیس نے گرفتار کر لیا گیا
ملزمان کے خلاف مقدمہ درج کرکے مزید قانونی کارروائی شروع pic.twitter.com/o0MMaMywhm
— . (@CMPunjabPK) March 18, 2020

جب کہ سینئر صحافی سلیم صافی نے سماجی رابطے کی ویب سایٹ ٹویٹر پر ٹویٹ کرتے ہوئے کہا کہ افسوسناک اور شرمناک ہے۔ابتدائی اور غیر حتمی معلومات کے مطابق مولانا صاحب کو مخالف پیر کے مریدوں نے تشدد کا نشانہ بنایا ہے۔ انہوں نے مزید کہا کہ دیکھتے ہیں دیگر پیران کرام اپنے پیٹی بند بھائی کی کتنی اور کیسی مذمت کرتے ہیں؟

افسوسناک اور شرمناک۔ ابتدائی اور غیر حتمی معلومات کے مطابق مولانا صاحب کو مخالف پیر کے مریدوں نے تشدد کا نشانہ بنایا ہے۔ دیکھتے ہیں دیگر پیران کرام اپنے پیٹی بند بھائی کی کتنی اور کیسی مذمت کرتے ہیں؟ https://t.co/HdRrrKH7Qa
— Saleem Safi (@SaleemKhanSafi) March 18, 2020

واضح رہے کہ گذشتہ روز ناصر مدنی نے اردوپوائنٹ کے اینکرپرسن فرخ شہباز وڑائچ سے گفتگو کرتے ہوئے بتایا ہے کہ 'مجھے ایک شخص نے لندن سے وٹس ایپ پر کال کی اور کہا کہ میں آپکا چاہنے والا ہوں میں اپنا بندہ بھیجتا ہوں آپ کھاریاں آئیں اور میرے ہوٹل اجوہ ہوٹل میں پروگرام کریں۔ ناصر مدنی کا کہنا تھا کہ میں نے کہا کہ پروگرامز پر کورونا کی وجہ سے پابندی ہے تو اس نے کہا کہ آپ بس دعا کروا دیں جس کے بعد میں کھاریا ہوٹل میں گیا جہاں مجھے کھانے کھلایا گیا اور پھر وہ شخص اپنے گھر لے گیا اور وہاں 10 سے 15 مسلحہ لوگ آگئے اور انہوں نے بندوقیں تان کر مجھے ایک کمرے میں بند کر کے میرے کپڑے اتروا کر تشدد کیا گیا، انہوں نے سفید کاغذ پر دستخط کروائے گئے اور ویڈیو بھی بنائی۔