پروفیسر خورشید احمد کا پنجاب یونیورسٹی کے سابق وائس چانسلر ڈاکٹر رفیق احمد کی وفات پر گہرے رنج و غم کا اظہار

جمعہ 27 مارچ 2020 17:31

اسلام آباد ۔ (اُردو پوائنٹ اخبارتازہ ترین - اے پی پی۔ 27 مارچ2020ء) سابق سینیٹر پروفیسر خورشید احمد نے پنجاب یونیورسٹی کے سابق وائس چانسلر ڈاکٹر رفیق احمد کی وفات پر گہرے رنج و غم کا اظہار کرتے ہوئے اپنے تعزیتی پیغام میں اُن کے وِصال کو قومی نقصان قرار دیا ہے۔ ان کا کہنا تھا کہ مرحوم پروفیسر جو کہ دنیا بھر میں اپنی علمی خدمات کی بنیاد پر سراہے جاتے تھے، ایک قومی اثاثہ تھے جن کی خدمات کو سنہرے الفاظ میں یاد رکھا جائے گا جبکہ ان کی وفات سے پیدا ہونے والے خلاء کو پورا کرنا بہت مشکل ہو گا۔

مرحوم پروفیسر کے ساتھ اپنی دیرینہ رفاقت پر روشنی ڈالتے ہوئے پروفیسرخورشید کا کہنا تھا کہ دونوں کو ایک ساتھ مختلف قومی خدمات سر انجام دینے کا موقع ملا جن میں خاص طور پر انسٹیٹیوٹ آف پالیسی سٹڈیز اور یونیورسٹی آف مینیجمنٹ اینڈ ٹیکنالوجی جیسے اداروں کی تعمیر و ترقی قابلِ ذکر ہیں۔

(جاری ہے)

ان کا کہنا تھا کہ ڈاکٹر رفیق تحریکِ پاکستان کے سرگرم کارکن اور بابائے قوم قائدِ اعظم محمد علی جناح کے سچے مداحوں میں سے تھے، ان کو ہمیشہ نظریہِ پاکستان کے پرجوش وکیل اور پُرعزم کارکن کے طور پر یاد رکھا جائے گا۔ سابق سینیٹر نے اس موقع پر پروفیسر ڈاکٹر رفیق کے اہلِ خانہ سے تعزیت کرتے ہوئے مرحوم کے درجات کی بلندی اور ان کے اہلِخانہ کو صبرعطا کرنے کی خصوصی دعا بھی کی۔