وزارت تعلیم نے ٹیلی سکول کے لئے خصوصی ایس ایم ایس سروس 8228 متعارف کرادی

ٹیلی سکول تعلیمی اداروں کی بندش کے باعث طلباء کے لئے تعلیمی سلسلہ جاری رکھنے کا ذریعہ ہے، وفاقی وزیر تعلیم شفقت محمود

بدھ 20 مئی 2020 22:23

اسلام آباد ۔ (اُردو پوائنٹ اخبارتازہ ترین - اے پی پی۔ 20 مئی2020ء) وزارت تعلیم نے ٹیلی سکول کے لئے خصوصی ایس ایم ایس سروس 8228 متعارف کرادی۔ ایس ایم ایس سروس سے ٹیلی سکول کے بہتر نتائج اور تدریسی عمل کو مؤثر بنانے کے لئے طلبائ اور والدین کا براہ راست فیڈ بیک حاصل ہو گا۔ وفاقی وزیر تعلیم شفقت محمود نے کہا کہ کورونا کی صورتحال میں وزارت تعلیم نے ہنگامی بنیادوں پر ٹیلی سکول کا آغاز کیا جو نا صرف تعلیمی اداروں کی بندش کے باعث طلباء کے لئے تعلیمی سلسلہ جاری رکھنے کا ذریعہ ہے بلکہ تعلیم بالغاں اور آؤٹ آف سکول بچوں کو تعلیمی دھارے کا حصہ بنانے کا زبردست موقع ہے۔

اس موقع سے بھرپور فائدہ اٹھانے کے لئے ضروری ہے کہ والدین اور طلباء کا فیڈ بیک حاصل کیا جائے جس کے لیے یہ ایس ایم ایس سروس متعارف کروائی جا رہی ہے۔

(جاری ہے)

ٹیلی سکول کے لئے 8228 ایس ایم سروس وزارت تعلیم، ڈیجیٹل پاکستان، پاکستان ٹیلی کام اتھارٹی، نیشنل ٹیلی کمیونیکیشن کارپوریشن اور تمام ٹیلی کام کمپنیوں کے اشتراک سے شروع کی جارہی ہے۔ اس موقع پر ڈیجیٹل پاکستان کی سربراہ تانیہ ادروس نے کہا کہ پاکستان میں تعلیمی نظام کو جدید خطوط پر استوار کرنے کے لئے ڈیجیٹل پلیٹ فارمز کی طرف جانا ایک اہم پیش رفت ہے۔ ٹیلی سکول ایس ایم ایس سروس کے ذریعے والدین اور طلباء سے سوالات کے ذریعے ان کی رائے لی جائے گی۔