عوام، ماہ صیام میں اعمال صالحہ کیلئے سخت محنت کریں، کرونا کے سامنے اہل ایمان سیسہ پلائی دیوار بن کر کھڑے ہیں، ڈاکٹر عبدالرحمن السدیس

ریاض (اُردو پوائنٹ اخبارتازہ ترین - این این آئی۔ 23 مئی2020ء) امام کعبہ اور مسجد حرام کے خطیب الشیخ ڈاکٹر عبدالرحمن السدیس نے عوام پر زور دیا ہے کہ وہ ماہ صیام میں اعمال صالحہ کیلئے سخت محنت کریں،رواں سال ماہ صیام ایسے موقع پرآیا ہے جب پوری دنیا اور سعودی قوم کرونا کی خطرناک وبا کی لپیٹ میں ہے، معاصر انسانی تاریخ میں اس وبا کی کوئی مثال نہیں ملتی، یہ وبا اللہ کی نشانیوں میں سے ایک نشانی ہے۔

ایک خطبے میں انہوں نے کہا کہ اللہ تعالیٰ کا فرمان ہے کہ ’’ہم آفاق اور ان کے اپنے جسموں میں میں ان انسانوں کو اپنی نشانیاں دکھائیں گے‘‘۔انہوں نے کہا کہ دنیا کا کوئی ایسا ملک اور خطہ نہیں جہاں کرونا کی وبا نے یلغار نہ کی ہو۔ مگر اس یلغار کے سامنے اہل ایمان سیسہ پلائی دیوار بن کر کھڑے ہیں۔

(جاری ہے)

ایک سچے مومن کا ایمان ہی اسے بحرانوں سے بچانے میں ڈھال بن سکتا ہے جو شخص اپنے رب پر یقین، اس کی تقدیر پرایمان،اپنے مالک ومولا سے حسن ظن اور سچا توکل کرتا ہے تو اس کا ایمان بحرانوں ، مصائب اور مشکلات میں اس کی ڈھال بن جاتا ہے۔

الشیخ عبدالرحمان السدیس نے کرونا سے نمٹنے کے لئے کام کرنے والے سرکاری اور نجی اداروں کی خدمات کو سراہتے ہوئے کہا کہ سعودی حکومت نے حادثات اور بحرانوں سے نکلنے کیلئے جرات مندانہ اور تاریخی فیصلے کیے جس کے نتیجے میں سعودی عرب میں کرونا کی وبا کو تباہ کن حد تک پھیلنے سے روک دیا گیااور بڑی تباہی سے بچا لیا گیا۔ انہوں نے کہاکہ انسداد کرونا مہم میں خادم الحرمین الشریفین شاہ سلمان بن عبدالعزیز اور ولی عہد شہزادہ محمد بن سلمان کی مساعی قابل تحسین اور قابل ستائش ہیں۔ اس کے علاوہ سعودی عرب کی پولیس اور محکمہ صحت نے بھی کرونا کی روک تھام کے لیے مشکل حالات میں کام جاری رکھ کر یہ ثابت کیا ہے کہ تمام ریاستی مشینری اس وقت کرونا کی وبا کی روک تھام کے لیے کام کررہی ہے۔