Live Updates

ٹی ٹونٹی ورلڈ کپ کے ممکنہ التوا پر بی سی سی آئی کی وضاحت

آئی پی ایل کیلئے ونڈو کی خاطر میگا ایونٹ کو موخر نہیں کرانا چاہتے :ارون دھومل

ذیشان مہتاب ہفتہ 23 مئی 2020 14:29

ٹی ٹونٹی ورلڈ کپ کے ممکنہ التوا پر بی سی سی آئی کی وضاحت

نئی دہلی (اردو پوائنٹ تازہ ترین اخبار۔23مئی 2020ء ) ٹی ٹونٹی ورلڈ کپ کے ممکنہ التوا پر بی سی سی آئی نے آخرکار وضاحت کردی اور بھارتی بورڈ کے خزانچی ارون دھومل کا کہنا ہے کہ آئی پی ایل کیلئے ونڈو کی خاطر میگا ایونٹ کو موخر نہیں کرانا چاہتے البتہ یہ بات قابل غور ضرور ہے کہ اگر جگہ دستیاب ہوئی تو آئی پی ایل کو اکتوبر اور نومبر میں کرانے کی کوشش کریں گے ۔

واضح رہے کہ کورونا وائرس کے باعث بی سی سی آئی کا 530 ملین ڈالرز کا ایونٹ آئی پی ایل منسوخی کے خدشے سے دوچار ہے اور آسٹریلین میڈیا سمیت دنیا بھر میں یہ افواہیں گرم ہیں کہ بھارتی حکام ممکنہ نقصان سے بچاؤ کیلئے آئی پی ایل کی خاطر ٹی ٹونٹی ورلڈ کپ کے التوا کی کوششوں میں مصروف ہیں۔ ارون دھومل کا کہنا تھا کہ ایک حالیہ اجلاس کے دوران اس معاملے پر گفتگو ہو چکی اور انہوں نے اپنی رائے دے دی جس پر فیصلہ آئی سی سی کا کام ہے اور بی سی سی آئی از خود ٹی ٹونٹی ورلڈ کپ کو آگے بڑھانے کی کوشش کیسے کر سکتا ہے ۔

(جاری ہے)

ان کا کہنا تھا کہ کرکٹ آسٹریلیا میگا ایونٹ کو شیڈول کے مطابق کرانے کیلئے پرعزم ہے تو بھارت کی کسی بھی تجویز سے کیا فرق پڑ سکتا ہے جب کہ شائقین کے بغیر ایونٹ کا انعقاد بھی کرکٹ آسٹریلیا کی مرضی پر منحصر ہے تاہم کیا اس ٹورنامنٹ کو خالی میدانوں پر کرانا درست ہوگا۔ان کا کہنا تھا کہ حالات بہتر ہو رہے ہیں لہٰذا انہیں ہر فیصلہ منظور ہوگا۔