گلگت بلتستان میں پاکستان مسلم لیگ (ن) کی حکومت نے کامیابی کے ساتھ اپنی پانچ سالہ مدت مکمل کرلی

جون کو گلگت بلتستان اسمبلی تحلیل ہوجائے گی اور حکومت کی مدت ختم ہوجائے گی،اب آئندہ عام انتخابات کے انعقاد کیلئے نگراں حکومت قائم ہوگی

منگل 23 جون 2020 16:45

اسلام آباد(اُردو پوائنٹ اخبارتازہ ترین - این این آئی۔ 23 جون2020ء) گلگت بلتستان میں پاکستان مسلم لیگ (ن) کی حکومت نے کامیابی کے ساتھ اپنی پانچ سالہ مدت مکمل کرلی، 24 جون کو گلگت بلتستان اسمبلی تحلیل ہوجائے گی اور حکومت کی مدت ختم ہوجائے گی۔ اب آئندہ عام انتخابات کے انعقاد کیلئے نگراں حکومت قائم ہوگی۔وزیراعظم عمران خان نے سابق ڈی آئی جی پولیس میر افضل کو نگران وزیراعلیٰ گلگت بلتستان مقرر کرنے کی منظوری دیدی ہے، الیکشن کمیشن آف گلگت بلتستان میر افضل کی بطور نگران وزیر اعلی تقرری کا نوٹی فکیشن جاری کریگا جبکہ پرسوں میر افضل اپنے عہدے کا حلف اٹھائیں گے۔

نگران وزیراعلی اب اپنی کابینہ بھی تشکیل دیں گے جس کیلئے تقریبا نام فائنل ہوچکے ہیں۔ذرائع کے مطابق نگراں کابینہ میں معروف کوہ پیما ثمینہ بیگ سمیت سابق سیاستدان، ججز، ماہرین صحت اور صحافت کے شعبہ سے وابسطہ افراد شامل کئے جانے کا امکان ہے۔

(جاری ہے)

نگران کابینہ میں جسٹس ریٹائرڈ مظفر حسین کو وزیر قانون، معروف صحافی ایمان شاہ کو وزیر اطلاعات، سابق رکن جی بی اسمبلی دیدار علی کو وزیر بلدیات ، شاہد عالم یا معروف کوہ پیما ثمینہ بیگ کو وزیر سیاحت، ڈاکٹر جلیل یا ڈاکٹر حسن اماچہ کو وزیر صحت، راجا نظیم وزیر خوراک، خوشی محمد طارق کو وزیر جنگلات مقرر کئے جانے کا امکان ہے۔

ان کے علاوہ بھی گلگت کے تمام اضلاع سے مزید شخصیات کا کایبنہ کا حصہ بنائے جانے کا امکان ہے۔واضح رہے کہ آئینی طور پر نگران حکومت کو نوے روز کے اندر عام انتخابات کرانا ہے تاہم کووڈ نائنٹین کے اس مشکل دور میں انتخابی مہم چلانا اور انتخابات کا انعقاد نگراں حکومت کیلئے کسی چیلنج سے کم نہیں ہوگا۔