ملک میں 3 ماہ بعد پہلی مرتبہ 1 ہزار سے کم کرونا کیسز رپورٹ ہوئے

3 مئی کے بعد پہلی مرتبہ 1 ہزار سے کم یومیہ کیسز سامنے آئے، گزشتہ 24 گھنٹوں کے دوران صرف 27 اموات ہوئی: صدر مملکت کا ٹوئٹ

محمد علی جمعہ 31 جولائی 2020 20:22

اسلام آباد (اُردو پوائنٹ اخبارتازہ ترین۔ 31 جولائی2020ء) ملک میں 3 ماہ بعد پہلی مرتبہ 1 ہزار سے کم کرونا کیسز رپورٹ ہوئے، صدر مملکت کی جانب سے کیے گئے ٹوئٹ میں بتایا گیا ہے کہ 3 مئی کے بعد پہلی مرتبہ 1 ہزار سے کم یومیہ کیسز سامنے آئے، گزشتہ 24 گھنٹوں کے دوران صرف 27 اموات ہوئی۔ تفصیلات کے مطابق صدر مملکت عارف حسین علوی کی جانب سے جمعہ کے روز کی گئی ٹوئٹ میں قوم کو بڑی خوشخبری سنائی گئی ہے۔

Congratulations to Pakistan. For first time after 3rd of May, our new Coronavirus cases are in three figures at 903 and deaths at less than 30 at 27 yesterday.

It is Allah's Grace, because of Smart Lockdown policies of government, and Credit to YOU, the smart people of Pakistan.
— Dr. Arif Alvi (@ArifAlvi) July 31, 2020

صدر مملکت کی جانب سے بتایا گیا ہے کہ 3 ماہ کے دوران آج پہلا موقع ہے جب 1 ہزار سے کم یومیہ کرونا کیس رپورٹ ہوئے۔ ان کا کہنا ہے کہ گزشتہ 24 گھنٹوں کے دوران صرف 903 کرونا کیس اور صرف 27 اموات رپورٹ ہوئیں۔ صدر مملکت کا کہنا ہے کہ حکومت کی سمارٹ لاک ڈاون پالیسی اور قوم کے ذمے دارانہ رویے کی وجہ سے یہ سب ممکن ہوا۔

(جاری ہے)

دوسری جانب نیشنل کمانڈ اینڈ آپریشن سینٹر کی جانب سے بتایا گیا ہے کہ ملک میں کرونا وائرس کے وار مزید کم ہونے لگے ہیں اور اس وقت پاکستان میں اس وبا کے فعال مصدقہ کیسز کی تعداد 25 ہزار 177 رہ گئی ہے۔

نیشنل کمانڈ اینڈ آپریشن سینٹر کے مطابق گزشتہ 24 گھنٹوں کے دوران ملک بھر میں 20 ہزار 507 کرونا ٹیسٹ کیے گئے، ملک بھر میں اب تک 19 لاکھ 73 ہزار 237 ٹیسٹ ہو چکے۔گزشتہ 24 گھنٹوں کے دوران ملک بھر میں صرف 903 نئے کیسز رپورٹ ہوئے، اس طرح ملک بھر میں کرونا وائرس کے مریضوں کی مجموعی تعداد 2 لاکھ 78 ہزار 305 تک جا پہنچی ہے جبکہ اس وائرس صحت یاب ہونے والے مریضوں کی تعداد 2 لاکھ 47 ہزار 177 ہوگئی ہے اور فعال کیسز کی تعداد 25 ہزار 177 رہ گئی ہے۔

سندھ میں کرونا کے مصدقہ مریضوں کی تعداد ایک لاکھ 20 ہزار 550 ہے، پنجاب میں 90 ہزار 873 ، خیبر پختونخوا میں 33 ہزار 958 ، بلوچستان میں 11 ہزار 732 ، اسلام آباد میں 15 ہزار 14 ، آزاد جموں و کشمیر 2 ہزار 73 اور گلگت بلتستان میں 2 ہزار 105 ہے۔گزشتہ 24 گھنٹوں کے دوران ملک بھر میں 27 افراد کرونا کا شکار ہوکر جاں بحق ہوگئے، اس طرح ملک بھر میں مجموعی اموات کی تعداد 5951 ہو گئی ہے جبکہ ملک بھر کے اسپتالوں میں 210 مریض وینٹی لیٹر پر ہیں۔