غیر قانونی پلاٹ الاٹمنٹ کیس ،نواز شریف کے قابل ضمانت وارنٹ جاری ،میر شکیل الرحمان کے جوڈیشل ریمانڈ میں 20اگست تک توسیع

بدھ 5 اگست 2020 20:31

لاہور(اُردو پوائنٹ اخبارتازہ ترین - این این آئی۔ 05 اگست2020ء) احتساب عدالت نے غیر قانونی پلاٹ الاٹمنٹ کیس میں سابق وزیراعظم محمد نواز شریف کے وارنٹ جاری کر دئیے جبکہ میر شکیل الرحمان کے جوڈیشل ریمانڈ میں 20اگست تک توسیع کردی گئی ۔میر شکیل الرحمان کو کورونا وائرس کے خدشات کی وجہ سے عدالت میں پیش نہ کیا گیا۔ عدالت نے میرشکیل الرحمان کے جوڈیشل ریمانڈ میں 22اگست تک توسیع کر دی۔

(جاری ہے)

عدالت میں نیب کے پیش کردہ ریفرنس میں نواز شریف کے پیش نہ ہونے ان کے قابل ضمانت وارنٹ جاری کردئیے گئے جبکہ کیس میں نامزد سابق ڈائریکٹر ایل ڈی اے فیض ہمایوں اور بشیر احمد کے پیش ہونے پر ان کی حاضری مکمل کرکے ریفرنس کی سماعت 20اگست تک ملتوی کردی گئی۔احتساب عدالت نے ایل ڈی اے سٹی سکینڈل میں گرفتار سابق ڈی جی ایل ڈی اے احد چیمہ کے کیس کی سماعت 19 اگست تک ملتوی کردی۔ کورونا کی وجہ سے احد چیمہ کو عدالت میں پیش نہ کیا گیا جس پر عدالت نے جوڈیشل ریمانڈ میں19اگست تک توسیع کر دی۔