شہزاد ارباب کے زیر صدارت افغانستان بارڈراور ویزا کے معاملات پر ٹاسک فورس کا اجلاس،

اسلام آباد(اُردو پوائنٹ اخبارتازہ ترین - این این آئی۔ 13 اگست2020ء) وزیر اعظم کے معاون خصوصی برائے اسٹیبلشمنٹ محمد شہزاد ارباب کی زیر صدارت پاک افغان پارلیمانی فرینڈشپ گروپ (پی ایف جی) ٹاسک فورس برائے بارڈر اور ویزے کے معاملات کا اجلاس قومی اسمبلی سیکرٹریٹ می ہوا۔ اجلاس کا مقصد پاک افغان بارڈر پر لوگوں کے مابین رابطے اور پاکستان اور افغانستان کے مابین دوطرفہ تجارت کو بہتر بنانے کے انتظامات سے متعلق پیشرفت کا جائزہ لینا تھا۔

وزیر اعظم کے خصوصی نمائندے ، محمد صادق ، محترمہ شندانہ گلزار خان ، ایم این اے ، مولانا صلاح الدین ایوبی ، ایم این اے ، مسٹر علی وزیر ، ایم این اے ،محسن داوڑ ، ایم این اے ، وزرات تجارت ، داخلہ ، ایف بی آر کے اعلی افسران ، این ایل سی اور بلوچستان اور کے پی حکومتوں کے نمائندے بھی اجلاس میں شریک تھے۔

(جاری ہے)

شہزاد ارباب کو متعلقہ محکموں کی جانب سے طورخم ، غلام خان ، انگور اڈہ اور چمن سرحدوں پر جاری پیشرفت کی آپریشنل تفصیلات کے بارے میں بریفنگ دی گئی۔

اس موقع پر ، شہزاد ارباب نے کہا کہ دوطرفہ تجارتی تعلقات اور لوگوں کے مابین رابطے کو بہتر بنانا دونوں ممالک کے لئے اہم ہے، افغانستان کو برآمدات کا حجم بڑھانے کیلئے ہمیں تجارتی عمل کو ہموار کرنے پر توجہ دینا ہوگی۔ممبر کسٹم نے بتایاکہ طورخم بارڈر پر روزانہ کی بنیاد پر 500 سے 600 کنٹینرز کلئیر کیے جارہے ہیں۔ مزید برآں ، کنٹینروں کی تیز اور شفاف کلیئرنس کے لئے ، آر-ایف-آئی-ڈی گیٹ خریدے گئے ہیں جو کے پی حکومت کی جانب سے این او سی کے اجرائ کے بعد لگائے جائیں گے۔

وزارت داخلہ نے بتایا کہ طورخم بارڈر پر انٹری ویزا ڈاک ٹکٹوں اور متعلقہ افرادی قوت کی تعداد میں اضافہ کیا گیا ہے جس سے لوگوں کے مابین رابطے میں آسانی ہوگی۔ مزید یہ کہ ، افغانستان سے متعلق نئی ویزا پالیسی کو جلد ہی حتمی شکل دی جائے گی۔ نئی ویزا پالیسی کے نفاذ سے دونوں ممالک کے عوام کے مابین سماجی ، معاشی اور تجارتی رابطوں کو بڑھانے میں مدد ملے گی۔

شہزاد ارباب کو بتایا گیا کہ طورخم بارڈر کی طرز پر چمن بارڈر کو 24/7 آپریشنل بنانے کے لئے مرحلہ وار پیشرفت ہو رہی ہے۔ غلام خان اور انگور اڈہ میں انفراسٹرکچر سے متعلق ترقی بھی جاری ہے جس سے افغانستان کے ساتھ باہمی تجارت میں اضافہ ہوگا۔ مزید یہ کہ این سی او سی کی جانب سے سرحدوں پر تجارت کے لئے پری کووڈ 19 ایس او پیز کو بحال کیا گیا ہے جس سے افغانستان کے ساتھ تجارت میں بھی بڑی آسانی ہوگی۔