ملالہ یوسف زئی اقوام متحدہ کی عالمی امور پر مبنی فلم کے لیے منتخب

نیویارک (اُردو پوائنٹ اخبارتازہ ترین۔ 16 ستمبر2020ء) اقوام متحدہ نے عالمی امور پر مبنی اپنی فلم کے لیے ملالہ یوسف زئی کو منتخب کرلیا ، فلم کا عنوان ہے ’ارجنٹ سلوشن فار ارجنٹ ٹائمز‘ جس کا پریمیئر 19 ستمبر کو اقوام متحدہ کے یوٹیوب چینل پر پیش کیا جائے گا ، فلم دورانیہ 30 منٹ کا ہے ۔ بین الاقوامی خبر رساں دارے کی رپورٹ کے مطابق کم عمر ترین نوبل انعام یافتہ تعلیمی و سماجی رہنما ملالہ یوسف زئی اب عالمی امور پر مبنی فلم میں نظر آئیں گی ، اقوام متحدہ نے عالمی امور پر مبنی اپنی اس فلم کے لیے ملالہ یوسف زئی اور گلوکارہ بیونس سمیت دیگر مشہور شخصیت کو منتخب کیا ہے ۔

اس حوالے سے بتایا گیا ہے کہ اس فلم میں ایک بہتر اور ترقی یافتہ دُنیا کی تعمیر کے لیے درکار اقدامات کا تعین کیا گیا ہے کیونکہ کورونا وائرس کی وجہ سے دُنیا بھر میں کافی مسائل پیدا ہوگئے ہیں ۔

(جاری ہے)

تفصیلات کے مطابق عالمی امور پر مبنی یہ فلم سیارے کی نشاندہی پر مشتمل ہے جو 10 سالوں میں ہماری دُنیا کو تبدیل کرسکتی ہے ، اس فلم میں گلوکارہ بیونس ، ملالہ یوسف زئی ، ڈان چیڈل ، مشیل یہو اور وائٹیکر نظر آئیں گے جبکہ عالمی امور پر مبنی اس فلم میں اقوام متحدہ کی ڈپٹی سیکریٹری جنرل آمنہ محمد اور سیکریٹری جنرل انتونیو گٹیرس بھی دکھائی دیں گی ، اس فلم کی ریڈیو نشریات اور پوڈ کاسٹ ورژن کی میزبانی کیلئے آسکر ایوارڈ یافتہ اداکارہ جولیا رابرٹس کی خدمات حاصل کی گئی ہیں ۔

واضح رہے کہ چند روز قبل ہی رواں سال گریجوئیشن کرنے والی دنیا کی کم عمر ترین نوبل انعام یافتہ پاکستانی سماجی رہنما اور تعلیمی کارکن ملالہ یوسف زئی نے آن لائن بک ریڈر کمپنی کے ساتھ بک کلب کا معاہدہ بھی کیا تھا ۔ ملالہ یوسف زئی نے امریکی ریاست ٹیکساس کے شہر آسٹن کی آن لائن بک ریڈر کمپنی (لٹراٹی)سے بک کلب کا معاہدہ کیا ۔