پی آئی اے کا متبادل ذرائع سے برطانیہ کا فلائٹ آپریشن بحال ہوگیا

نئے یورپی جہازوں کے ساتھ 30 اکتوبر سے برطانیہ کیلئے پروازوں کا آغاز ہوگا، ٹکٹوں کی بکنگ شروع

محمد علی ہفتہ 17 اکتوبر 2020 20:33

پی آئی اے کا متبادل ذرائع سے برطانیہ کا فلائٹ آپریشن بحال ہوگیا

لاہور (اُردو پوائنٹ اخبارتازہ ترین۔ 17 اکتوبر2020ء) پاکستان ائیرلائن نے کئی ماہ کے تعطل کے بعد برطانیہ کیلئے فلائٹ آپریشن بحال کرنے کی تیاریاں کر لی ہیں۔ تفصیلات کے مطابق پی آئی اے کا متبادل ذرائع سے برطانیہ کا آپریشن بحال ہوگیا ہے۔ نئے یورپی جہازوں کے ساتھ 30 اکتوبر سے برطانیہ کیلئے پروازوں کا آغازہوگا، پیلے مرحلے میں اسلام آباد تا لندن، لاہور تا لندن اور اسلام آباد تا مانچسٹر کی پروازوں چلائی جائیں گی ، نئے جہاز، آرام دہ نشستیں, حلال کھانا اور دنیا کے بہترین ان فلائٹ انٹرٹینمنٹ کے حامل پروازیں براہ راست آپریٹ کریں گی۔

ترجمان پی آئی اے کے مطابق پی ائی اے نے بکنگ کا آغاز کردیا ہے ۔ پی آئی اے حکام کا کہنا ہے کہ امید ہے ہمارے مہمانان کسی بھی بہترین ائیرلائن سے بہتر یا ہم پلہ سروس کیلئے قومی ائیرلائن کا انتخاب کریں گے۔

(جاری ہے)

پی آئی اے نے 14اگست سے برطانیہ کے لئے متبادل انتظامات کے تحت فضائی آپریشن بحال کرنے کا اعلان کیا تھا ۔ متبادل آپریشن کے ذریعے مسافر براہِ راست پاکستان اور لندن، مانچسٹر اور برمنگھم کا سفر کر سکیں گے۔

مزید بتایا گیا ہے کہ حکومت یورپ اور برطانیہ کے لئے پی آئی اے کے فضائی آپریشن کی مکمل بحالی کے لئے ہر ممکن کوشش کر رہی ہے۔ واضح رہے کہ جعلی پائلٹس کا معاملہ سامنے آنے کے بعد دیگر یورپی ممالک کے علاوہ برطانیہ نے بھی پی آئی اے پروازوں پر پابندی عائد کر دی تھی۔ پابندی کے تحت پی آئی اے کے طیاروں کو برطانیہ میں لینڈنگ کی اجازت نہیں ہے۔ اسی باعث اب پی آئی اے نے متبادل طیاروں کا انتظام کر کے برطانیہ کیلئے پروازیں بحال کرنے کی تیاریاں مکمل کر لی ہیں۔