پاکستان کا جلال آبادکے سٹیڈیم میں المناک حادثے میں قیمتی جانوں کے ضیاع پر رنج وغم اور افسوس کا اظہار

افغانستان میں پاکستان کا سفارت خانہ اور اس کے ذیلی مشنز نئی ویزا پالیسی پر عمل درآمد اور زیادہ سے زیادہ تعداد میں ویزا درخواستوں پر سہولت فراہم کرنے کیلئے پرعزم ہیں،دفترخارجہ

بدھ اکتوبر 17:50

پاکستان کا جلال آبادکے سٹیڈیم میں المناک حادثے میں قیمتی جانوں کے ضیاع ..
اسلام آباد(اُردو پوائنٹ اخبارتازہ ترین - این این آئی۔ 21 اکتوبر2020ء) پاکستان نے جلال آبادکے سٹیڈیم میں المناک حادثے میں قیمتی جانوں کے ضیاع پر رنج وغم اور افسوس کا اظہار کرتے ہوئے کہا ہے کہ ہمیں جلال آباد سٹیڈیم میں بھگدڑ کے نتیجے میں افغان قیمتی جانوں کے ضیاع اور افراد کے زخمی ہونے کی خبر سن کر دلی رنج وغم اور افسوس ہوا ہے۔ دفتر خارجہ سے جاری بیان کے مطابق یہ واقعہ افغانستان میں پاکستان کے قونصلیٹ جنرل سے کئی کلومیٹر دور اس مقام پر پیش آیا جہاں صوبائی حکام نے پاکستانی ویزا کے حصول کے لئے آنے والے افغان شہریوں کے لئے انتظامات کئے ہوئے تھے۔

ہم متاثرہ خاندانوں سے اس حادثے پر تعزیت اور ہمدردی کرتے ہیں۔بڑی تعداد میں ویزا کے لئے درخواستوں کے موصول ہونے کی بناپر حکومت پاکستان نے اپنے افغان بھائیوں اور بہنوں کی سہولت کے لئے حال میں نئی ویزا پالیسی کا اعلان کیا ہے۔

(جاری ہے)

کابل میں پاکستانی سفارت خانہ اور جلال آباد، قندھار، ہرات اور مزارشریف میں ذیلی مشنز افغان درخواستوں پر ملٹی پل ویزا جاری کررہے ہیں تاکہ افغان شہری پاکستان میں اپنے خاندان، کاروبار، علاج، تعلیم اور دیگر مقاصد کے لئے تشریف لاسکیں۔

افغانستان میں پاکستان کا سفارت خانہ اور اس کے ذیلی مشنز نئی ویزا پالیسی پر عمل درآمد اور زیادہ سے زیادہ تعداد میں ویزا درخواستوں پر سہولت فراہم کرنے کے لئے پرعزم ہیں۔ افغان عوام سے تعاون کی درخواست کرتے ہوئے افغان حکام سے ہماری گزارش ہے کہ ویزا کے حصول کے لئے آنے والے درخواست گزاروں کے لئے بہتر انتظامات کئے جائیں تاکہ ان کا تحفظ اور سہولت یقینی بنائی جائے۔