صدر آزادکشمیر کی لائن آف کنٹرول پر بھارتی فوج کی طرف سے شادی کی تقریب پر فائرنگ کی شدید مذمت

بھارتی فوج کا شہری آبادی خاص طور پر عورتوں اور بچوں کو نشانہ بنانا عالمی برادری خاص طور پر انسانی حقوق کی بین الاقوامی اداروں کیلئے لمحہ فکریہ ہے،سردارمسعود خان

اتوار 22 نومبر 2020 17:45

صدر آزادکشمیر کی لائن آف کنٹرول پر بھارتی فوج کی طرف سے شادی کی تقریب ..

اسلام آباد(اُردو پوائنٹ اخبارتازہ ترین - این این آئی۔ 22 نومبر2020ء) آزاد جموں وکشمیر کے صدر سردار مسعود خان نے لائن آف کنٹرول کے کھوئیرٹہ سیکٹر میں شادی کی ایک تقریب پر بھارتی فوج کی فائرنگ کی شدید الفاظ میں مذمت کرتے ہوئے اسے بھارتی فوج کی بربریت اور ننگی جارحیت قرار دیا ہے۔ بھارتی فوج کی فائرنگ سے چھ خواتین، دو کم سن بچیوں اور ایک دس سالہ بچے سمیت ایک ہی خاندان کے گیارہ افراد زخمی ہوئے ہیں۔

صدر آزادکشمیر نے کہا کہ بھارتی فوج کا شہری آبادی خاص طور پر عورتوں اور بچوں کو نشانہ بنانا عالمی برادری خاص طور پر انسانی حقوق کی بین الاقوامی اداروں کے لئے لمحہ فکریہ ہے۔ انہوں نے مقبوضہ اورآزادکشمیر میں تعینات اقوام متحدہ کے فوجی مبصرین سے مطالبہ کیا کہ وہ فی الفور لائن آف کنٹرول کی صورتحال اور بھارتی فوج کی طرف سے جنگ بندی کی خلاف ورزی سے اقوام متحدہ کے سیکرٹری جنرل انتینو گتریس اور سلامتی کونسل کے ارکان کو مطلع کریں۔

(جاری ہے)

صدر آزادکشمیر نے مزید کہا کہ مقبوضہ کشمیر میں تعینات بھارتی فوج ریاستی دہشت گردی اور انسانی حقوق کی خلاف ورزیوں سے توجہ ہٹانے کے لئے آزادکشمیر کے بے گناہ شہریوں خاص طور پر عورتوں اور بچوں کو نشانہ بنا کر مقبوضہ کشمیر کی صورتحال سے دنیا کی توجہ ہٹانا چاہتی ہے۔