جماعة الدعوة کے رہنماؤں حافظ عبدالسلام بن محمد، پروفیسر حافظ عبدالرحمن مکی، پروفیسر ظفر اقبال اور محمد اشرف کو دو مزید مقدمات میں سزائیں

حافظ عبدالسلام بن محمد، پروفیسر ظفر اقبال اور محمد اشرف کو ساڑھے پندرہ، پندرہ سال ،پروفیسر عبدالرحمن مکی کو چھ ماہ قید کی سزا سنائی گئی

جمعرات 3 دسمبر 2020 23:03

لاہور(اُردو پوائنٹ اخبارتازہ ترین - این این آئی۔ 03 دسمبر2020ء) انسداد دہشتگردی کی خصوصی عدالت نے جماعة الدعوة کے رہنماؤں حافظ عبدالسلام بن محمد، پروفیسر حافظ عبدالرحمن مکی، پروفیسر ظفر اقبال اور محمد اشرف کو دو مزید مقدمات میں سزائیں سنا دیں۔انسداددہشتگردی کی خصوصی عدالت نمبر 3 کے جج اعجاز احمد بٹر کی عدالت میں مقدمہ نمبر 40/19میں حافظ عبدالسلام بن محمد، پروفیسر ظفر اقبال اور محمد اشرف کو ساڑھے پندرہ، پندرہ سال جبکہ پروفیسر حافظ عبدالرحمن مکی کو چھ ماہ قید کی سزا سنائی گئی ہے۔

اسی طرح مقدمہ نمبر 27/19کی بھی سماعت ہوئی جس میں حافظ عبدالسلام بن محمد اور پروفیسر ظفر اقبال کو ساڑھے پندرہ، پندرہ سال اور پروفیسر حافظ عبدالرحمن مکی کو چھ ماہ قید کی سزا سنائی گئی ۔

(جاری ہے)

جماعة الدعوة کے رہنماؤں کو دونوں مقدمات میں الگ الگ ایک لاکھ ستر ہزار روپے جرمانہ کی سزا بھی سنائی گئی ہے۔ عدالت میں زیر سماعت مقدمات میں گواہوں کے بیانات پر نصیرالدین نیئر اور محمد عمران فضل گل ایڈووکیٹ کی طرف سے جرح کی گئی۔

انسداد دہشت گردی عدالت نمبر 1 کے جج ارشد حسین بھٹہ کی عدالت میں بھی مختلف مقدمات کی سماعت ہوئی۔ مذکورہ عدالت نے سماعت آٹھ دسمبر تک کیلئے ملتوی کی ہے۔انسداد دہشتگردی کی خصوصی عدالتوں میں جماعة الدعوة کے رہنماؤں کے خلاف سی ٹی ڈی کی طرف سے کل اکتالیس مقدمات درج ہیں جن میں سے ستائیس کے فیصلے ہو چکے ہیں جبکہ باقی اے ٹی سی عدالتوں میں زیرسماعت ہیں۔