ڈسٹرکٹ جیل ملتان میں قیدی کے ٹک ٹاک ویڈیوز بنانے کی رپورٹ 24 گھنٹوں میں وزیر جیل خانہ جات کو پیش

ٹک ٹاک ویڈیوز 5 جنوری کو ملزم کی ملتان کچہری میں پیشی کے موقع پر بخشی خانہ میں بنائی گئی‘ صوبائی وزیر فیاض الحسن چوہان

جمعہ 8 جنوری 2021 12:59

لاہور(اُردو پوائنٹ اخبارتازہ ترین - این این آئی۔ 08 جنوری2021ء) ڈسٹرکٹ جیل ملتان میں قیدی کے ٹک ٹاک ویڈیوز بنانے کی رپورٹ 24 گھنٹوں میں وزیر جیل خانہ جات کو پیش کر دی گئی۔صوبائی وزیر اور آئی جیل خانہ جات پنجاب کے احکامات پر ڈی آئی جی جیل خانہ جات ملتان ریجن نے انکوائری کی۔صوبائی وزیر فیاض الحسن چوہان کے مطابق گیٹ بک، سی سی ٹی وی فوٹیج اور جوڈیشل ریکارڈ بغور ملاحظہ کیا گیا۔

ملزم بابر علی عرف مرغی کے خلاف قتل کے مقدمہ سمیت سات ایف آئی آرز درج تھیں۔ مذکورہ ٹک ٹاک ویڈیوز 5 جنوری کو ملزم کی ملتان کچہری میں پیشی کے موقع پر بخشی خانہ میں بنائی گئی۔ویڈیوز ملزم کے رشتہ داروں نے پیشی پر صلح اور رہائی کے احکامات کے بعد بنائیں۔ ملزم سمیت تمام ساتھی قیدیوں کے بیانات بھی اس ضمن میں قلمبند کیے گئے۔

(جاری ہے)

پولیس گارڈز بخشی خانہ کے خلاف قانونی کاروائی کے حوالے سے سی پی او ملتان کو لیٹر لکھ دیا گیا ہے۔

فیاض الحسن چوہان نے کہا کہ ویڈیوز میں ملزم کو ہتھکڑی لگی دیکھی جا سکتی ہے جو جیل کے اندر قیدیوں کو نہیں لگائی جاتی۔ ملزم کی بیرک کی مکمل تلاشی کے دوران بھی کوئی ممنوعہ سامان برآمد نہیں ہوا۔ تمام قیدیوں کو مکمل جامہ تلاشی اور میٹل ڈیٹیکٹر سے چیک کرنے کے بعد اندر بھیجا جاتا ہے۔ جیلوں میں موبائل جیمرز بھی ہمہ وقت چل رہے ہوتے ہیں،جیلوں میں قیدیوں کے ساتھ امتیازی سلوک کی سرکوبی میرا اولین مشن ہے۔