Live Updates

بھارت کے شہر ممبئی کی سب سے پرانی کراچی بیکری کو بند کردیا گیا

مشہور ترین کراچی بیکری کے مالک سندھی ہندو ،تقسیم ہند کے بعد کراچی سے ممبئی رہائش پذیر ہو گئے تھے،رپورٹ

جمعہ مارچ 16:32

بھارت کے شہر ممبئی کی سب سے پرانی کراچی بیکری کو بند کردیا گیا
ممبئی (اُردو پوائنٹ اخبارتازہ ترین - این این آئی۔ 05 مارچ2021ء) بھارت کے شہر ممبئی کی سب سے پرانی کراچی بیکری کو بند کردیا گیا۔بھارتی ٹی وی کے مطابق ممبئی میں واقع بھارت کی سب سے پرانی اور مشہور ترین کراچی بیکری پر انتہا پسندوں کی جانب سے ایک ماہ قبل حملہ کیا گیا تھا اور آخر کار شدید احتجاج کے بعد اسے بند کر دیا گیا ہے۔اس بیکری کو صرف اس لیے حملے کا نشانہ بنایا گیا کیونکہ اس کا نام کراچی کے نام پر ہے۔

واضح رہے کہ ممبئی میں واقع واحد، مشہور ترین کراچی بیکری کے مالک سندھی ہندو ہیں جو تقسیم ہند کے بعد کراچی سے ہجرت کر کے بھارتی شہر ممبئی رہائش پذیر ہو گئے تھے۔کچھ ماہ قبل بھارتی انتہا پسندوں کی جانب سے پاکستان سے اپنی نفرت کا اظہار کرتے ہوئے بیکری کا نام کراچی ہونے پر اعتراض اٹھایا گیا اور بیکری کے مالک کو قانونی نوٹس جاری کیا گیا اور نام تبدیل کرنے کا کہا گیا۔

(جاری ہے)

بیکری کے مالک نے نوٹس کے جواب میں اپنے سوشل میڈیا اکاونٹ پر ایک ویڈیو جاری کی جس میں کہا گیا کہ یہ بیکری کراچی کے نام سے مشہور ہو چکی ہے اس لیے نام کی تبدیلی نا ممکن ہے۔رپورٹس کے مطابق اس بیکری کو کورونا وائرس کی وبا کے دوران بھی کافی معاشی نقصان پہنچا ہے۔دوسری جانب ممبئی کے متعدد ٹوئٹر صارفین کی جانب سے کراچی بیکری کے بند ہونے پر افسردگی کا اظہار کیا جا رہا ہے جس میں ان کا کہنا تھا کہ یہ ممبئی شہر کا نقصان ہے۔بھارتی ٹوئٹر صارفین کا کراچی بیکری کی تصاویر شیئر کرتے ہوئے کہناتھا کہ کراچی بیکری ممبئی میں واحد اور مشہور ترین بیکری تھی۔
پاکستان میں کرونا وائرس کی تیسری لہر سے متعلق تازہ ترین معلومات