قومی اسمبلی نے وزیراعظم عمران خان پر اعتماد کی قرارداد کی منظور دے دی

ہفتہ 6 مارچ 2021 13:35

اسلام آباد (اُردو پوائنٹ اخبارتازہ ترین - اے پی پی۔ 06 مارچ2021ء) قومی اسمبلی نے وزیراعظم عمران خان پر اعتماد کی قرارداد کی منظور دے دی ہے‘ مجموعی طور پر پاکستان تحریک انصاف اور اس کی اتحادی جماعتوں کے 178 ارکان نے وزیراعظم عمران خان پر اعتماد کا اظہار کیا ہے‘ آئین کے آرٹیکل 91 کی ذیلی شق 7 کے تقاضے کو پورا کرتے ہوئے قومی اسمبلی کا اجلاس طلب کیا گیا تھا‘ وزیراعظم عمران خان نے 2018ءمیں وزارت عظمیٰ کا منصب سنبھالا تھا تو اس وقت قومی اسمبلی کے 176 ارکان نے اعتماد کا ووٹ دیا تھا۔

ہفتہ کو قومی اسمبلی کا اجلاس سپیکر اسد قیصر کی زیر صدارت ہوا۔ اجلاس کے آغاز پر وزیر خارجہ شاہ محمود قریشی نے قرارداد پیش کی کہ یہ ایوان اسلامی جمہوریہ پاکستان کے دستور کے آرٹیکل 91 کی شق (7) کی مقتضیات کے مطابق اسلامی جمہوریہ پاکستان کے وزیراعظم عمران خان پر اعتماد کا اظہار کرتا ہے۔

(جاری ہے)

سپیکر نے ایوان میں ووٹنگ کا طریقہ کار بتاتے ہوئے کہا کہ ووٹنگ کا عمل شروع ہونے سے قبل پانچ منٹ تک گھنٹیاں بجائی جائیں گی۔

تمام داخلی دروازے بند کردیئے جائیں گے۔ ووٹنگ کا عمل مکمل ہونے تک کوئی دروازہ نہیں کھلے گا اور کوئی اندر آسکے گا نہ باہر جاسکے گا۔ ارکان کا نام پکارنے پر ہر رکن ان کے دائیں طرف لابی میں جاکر اپنا ووٹ رجسٹرڈ کرائے گا۔ اس کے بعد سپیکر نے اعتماد کے ووٹ کے لئے عمل شروع کیا اور ایوان میں پانچ منٹ تک گھنٹیاں بجانے کا حکم دیا۔ پانچ منٹ بعد سپیکر نے تمام داخلی دروازے بند کرنے کا حکم دیا۔

سپیکر نے وزیر خارجہ شاہ محمود قریشی کی طرف سے پیش کردہ قرارداد ایوان میں پیش کی۔ تمام ارکان نے قرارداد کا ڈیسک بجا کر بھرپور انداز میں خیر مقدم کیا۔ اس دوران اپوزیشن کی طرف سے صرف ایک رکن محسن داوڑ ایوان میں موجود رہے۔ سپیکر نے کہا کہ جو ارکان اعتماد کا ووٹ دینا چاہتے ہیں وہ ان کی دائیں طرف کی لابی میں جاکر اپنا ووٹ رجسٹرڈ کرائیں۔

اس کے بعد قومی اسمبلی کے ارکان نے یکے بعد دیگرے لابی میں جاکر اپنا ووٹ رجسٹرڈ کرایا۔ وزیراعظم عمران خان نے بھی تمام ارکان کے ہمراہ لابی میں جاکر اپنا ووٹ رجسٹرڈ کرایا۔ ووٹنگ کا عمل مکمل ہونے پر اراکین ایوان میں واپس آئے جس کے بعد سپیکر نے قرارداد کے حق میں ڈالے گئے ووٹ کی تعداد کا اعلان کیا۔ انہوں نے ایوان کو بتایا کہ وزیراعظم کے حق میں اعتماد کی قرارداد منظور ہوگئی ہے۔ سپیکر نے کہا کہ اس سے قبل اگست 2018ءمیں عمران خان 176 ووٹ لے کر وزیراعظم منتخب ہوئے تھے تاہم اب انہوں نے اڑھائی سال بعد 178 ووٹ حاصل کئے۔