جن کو لائنوں میں نہیں لگنا، پیسے دے کر ویکسین لگوا لیں، فواد چودھری

حکومت تمام شہریوں کو مفت ویکسین لگا رہی ہے، لیکن کروڑں لوگوں کو ویکسین ایک منظم طریقہ سے ہی لگائی جا سکتی ہے۔ وفاقی وزیر سائنس اینڈ ٹیکنالوجی

ثنااللہ ناگرہ منگل 23 مارچ 2021 19:37

جن کو لائنوں میں نہیں لگنا، پیسے دے کر ویکسین لگوا لیں، فواد چودھری

لاہور(اردوپوائنٹ اخبارتازہ ترین۔ 23 مارچ2021ء) وفاقی وزیر سائنس اینڈ ٹیکنالوجی فواد چودھری نے کہا ہے کہ جن کو لائنوں میں نہیں لگنا، پیسے دے کر ویکسین لگوا لیں،حکومت تمام شہریوں کو مفت ویکسین لگا رہی ہے، لیکن کروڑں لوگوں کو ویکسین ایک منظم طریقہ سے ہی لگائی جا سکتی ہے۔ انہوں نے ٹویٹر پر پرائیویٹ ویکسین مہنگی ہونے کی تنقید کے جواب میں کہا کہ حکومت تمام شہریوں کو مفت ویکسین لگانے کا پہلے ہی اعلان کر چکی ہے، لیکن کروڑں لوگوں کو ویکسین ایک منظم طریقہ سے ہی لگائی جا سکتی ہے، پرائیویٹ درآمد کی اجازت اس لئے دی گئ ہے کہ جو لوگ لائن میں نہیں لگنا چاہتے وہ پیسے دیں اور ویکسین لگوا لیں، اس پر اعتراض کی وجہ سمجھ نہیں آئی۔

دوسری جانب محکمہ صحت پنجاب نے گزشتہ 24 گھنٹوں کے دوران جہاں لاہور میں 9 ہزار 605 مرد و خواتین کو کورونا ویکسین لگائی ہے تو وہاں کورونا وائرس کی تیسری لہر گزشتہ 24 گھنٹوں میں مزید 16 زندگیاں نگل گئی ہے جبکہ کورونا کے 1 ہزار 58 نئے کیسز بھی سامنے آگئے ہیں۔

(جاری ہے)

اعدادو شمارکے مطابق اس وقت شہر کے سرکاری اور نجی ہسپتالوں میں 482 کورونا کے مریض داخل ہیں جن میں سے 127 مریض آئی سی یو اور 84 مریض وینٹی لیٹرز پر زیر علاج ہیں جبکہ کرونا سے ہونے والی اموات میں سے سب سے زیادہ اموات میو ہسپتال میں ہوئیں جہاں اموات کی تعداد 5 ہے اسی طرح جناح ہسپتال میں تین، فاروق ہسپتال میں تین، اتفاق ہسپتال میں دو اور دیگر سرکاری اور نجی ہسپتالوں میں ایک ایک اموات واقع ہوئی ہیں۔

فارما کمپنی کے ٹیکنیکل ایڈوائزر ڈاکٹر حسن عباس نے کہا ہے کہ چین سے کرونا ویکسین 25 مارچ کو پاکستان پہنچے گی، کین سائینو کورونا ویکسین کی قیمت 4 ہزار 225 روپے ہوگی۔ ایک انٹرویو میں انہوں نے کہا کہ روس کے بعد چین سے بھی نجی سیکٹر کے لیے کرونا ویکسین پاکستان پہنچ رہی ہے۔ ڈاکٹر حسن نے کہا کہ چین سے کرونا ویکسین 25 مارچ کو پاکستان پہنچے گی، کین سائینو بائیو کی پہلی کھیپ 10 ہزار ڈوزز پر مشتمل ہے، یہ سنگل ڈوز ہے۔ان کے مطابق کین سائینو بائیو کی دوسری کھیپ آئندہ ماہ پاکستان آئے گی، ویکسین لاہور، کراچی اور اسلام آباد کے 3 مخصوص اسپتالوں میں دستیاب ہوگی۔ ویکسی نیشن کے لیے مخصوص اسپتال سے اپائنٹ منٹ لینی ہوگی۔