ایس بی پی قانون میں ترمیم کا آرڈیننس پبلک کیا جائے، رضا ربانی

آرڈیننس اجراء کے بعد اٴْسے چھپانا پی ٹی آئی حکومت کی عادت بن چکی ہے، رہنماء پیپلز پارٹی

بدھ 14 اپریل 2021 23:49

اسلام آباد (اُردو پوائنٹ اخبارتازہ ترین - این این آئی۔ 14 اپریل2021ء) سابق چیئرمین سینیٹ اور پیپلز پارٹی کے سینئر رہنما رضا ربانی نے کہا ہے کہ آرڈیننس اجراء کے بعد اٴْسے چھپانا پی ٹی آئی حکومت کی عادت بن چکی ہے۔ایک بیان میں رضا ربانی نے کہا کہ وفاقی حکومت سٹیٹ بینک آف پاکستان (ایس بی پی) قانون میں ترمیم کا آرڈیننس پبلک کرے۔

(جاری ہے)

انہوں نے کہا کہ قانون شہادت آرڈر کے تحت آرڈیننس ایک پبلک دستاویز ہے، جسے پبلک کرنا ہوتا ہے۔

سابق چیئرمین سینیٹ نے کہا کہ حکومت کی تمام وزارتیں اور محکمے آرڈیننس کی کاپی مہیا کرنے سے انکار کررہے ہیںانہوں نے کہا کہ آرڈیننس اجرا ء کے بعد اسے چھپانا اس حکومت کی عادت بن گئی ہے۔رضا ربانی نے کہا کہ سٹیٹ بینک آئی ایم ایف کا تابع محکمہ بن گیا ہے، جو آئی ایم ایف کے ماتحت کام کرے گا۔