دیہی خواتین محنت،محبت،احساس ذمہ داری اور قربانی کی زندہ مثال ہیں، مریم نواز

بدھ 15 اکتوبر 2025 17:57

لاہور (اُردو پوائنٹ اخبارتازہ ترین - اے پی پی۔ 15 اکتوبر2025ء) وزیراعلی پنجاب مریم نواز نے کہا ہے کہ دیہی خواتین محنت، محبت، احساس ذمہ داری اور قربانی کی زندہ مثال ہیں، دیہی عورت پنجاب کی ترقی میں اپنا کردار ادا کررہی ہے۔بدھ کے روز دیہی خواتین کے عالمی دن پر جاری اپنے ایک پیغام میں انہوں نے کہا کہ دیہی خواتین کے حقوق کا دن منانے کامقصدانکی محنت اور کاوشوں کا اعتراف کرنا ہے، دیہی خواتین کی عظمت، قربانی اور انتھک محنت کو خراجِ تحسین پیش کرتے ہیں۔

وزیر اعلی نے کہا کہ دیہی خواتین محنت، محبت، احساس ذمہ داری اور قربانی کی زندہ مثال ہیں،ان کی محنت سے پنجاب کی زمین لہلہاتی ہے،گھر آباد ہوتے اور معیشت مستحکم ہوتی ہے۔ انہوں نے کہا کہ دیہی عورت محض ایک محنت کش نہیں بلکہ پنجاب کی ترقی میں اپنا کردار ادا کررہی ہے،دیہی خاتون سمیت ہر عورت کا تحفظ میری ریڈ لائن ہے، چاہتی ہوں کہ دیہی خواتین صرف فارمر نہ رہیں بلکہ خود فیصلہ ساز اور معاشی قوت بنیں ۔

(جاری ہے)

مریم نواز نے کہا کہ ایک مضبوط، خودکفیل اور خوشحال پنجاب کی تعمیر دیہی خواتین کے کردار کے بغیر ممکن نہیں ،حکومت پنجاب نے دیہی خواتین کے لیے نئے مواقع، آسان سہولیات اورہنر مندی کے پروگرام لانچ کئے ہیں،دیہی خواتین کسان کارڈ،لائیوسٹاک کارڈ،ہمت کارڈ سے مستفید ہو رہی ہیں۔انہوں نے کہا کہ دیہی خواتین کیلئے پنجاب کے تمام بنیادی مراکز صحت کو اپ گریڈ کیا جا رہا ہے،کاروبار کیلئے بلاسود قرضے، لیپ ٹاپ اور تعلیمی سکالرشپ سے دیہی بیٹیوں کی زندگیوں میں حقیقی تبدیلی آرہی ہے، دیہی خواتین کو ترقی کے دور میں شریک کرنے کیلئے سکل ڈویلپمنٹ پروگرام کاآغاز کر رہے ہیں، دیہی خواتین کے خود روزگارکے لیے انہیں مویشی مہیا کیے جارہے ہیں۔

وزیر اعلی مریم نواز نے مزید کہا کہ ورچوئل پولیس اسٹیشن ہر طبقہ کی خواتین کے حقوق کا تحفظ یقینی بنانے کے لیے قائم کیا گیا ہے۔