آزاد کشمیر الیکشن 25 جولائی کو ہوں گے ،چیف الیکشن کمشنر نے شیڈول جاری کر دیا

21 جون تک کاغذات نامزدگی داخل، 26 جون تک کاغذات کی جانچ پڑتال ہو گی 3 جولائی کوامیدواروں کی حتمی فہرست آویزاں، انتخابی نشانات 4 جولائی کو الاٹ ہوں گے

جمعرات 10 جون 2021 20:33

مظفر آباد( آن لائن ) چیف الیکشن کمشنر جسٹس (ر) عبدالرشید سلہریا نے اعلان کیا ہے کہ آزاد کشمیر اسمبلی کے انتخابات 25 جولائی کو ہوں گے۔ آزاد کشمیر قانون ساز اسمبلی کے گیارویں عام انتخابات کا شیڈول جاری ہو گیا ہے، اور چیف الیکشن کمشنر جسٹس (ر) عبدالرشید سلہریا نے اعلان کیا ہے کہ آزاد کشمیر اسمبلی کے لئے انتخابات 25 جولائی کو ہوں گے۔

(جاری ہے)

چیف الیکشن کمشنر کے مطابق آزاد کشمیر کے 33 جبکہ مہاجرین جموں کشمیر کے 12 حلقوں میں انتخابات کاانعقاد ہوگا، حالیہ انتخابات میں گزشتہ انتخابات کی نسبت 4 انتخابی حلقوں کا اضافہ کیا گیا ہے، آزاد کشمیر میں 28 لاکھ 17 ہزار 90 ووٹرز، جب کہ مجموعی طور پر 32 لاکھ 20 ہزار 546 کشمیری ووٹرز اپنا حق رائے دہی استعمال کریں گے، جن میں مرد ووٹر کی تعداد 15 لاکھ 19 ہزار 347 اورخواتین ووٹرز کی تعداد 12 لاکھ 97 ہزار 743 ہے۔

چیف الیکشن کمشنر نے بتایا کہ امیدوار 21 جون شام 4 بجے تک کاغذات نامزدگی داخل کراسکتے ہیں، 26 جون تک کاغذات کی جانچ پڑتال کی جائے گی، 27 جون تک اعتراضات داخل کرائے جا سکیں گے، 2 جولائی تک کاغذات کی واپسی ہو سکے گی، 3 جولائی کوامیدواروں کی حتمی فہرست آویزاں ہوگی، اور امیدارواں کو انتخابی نشانات 4 جولائی کو الاٹ ہوں گی