اسد عمر سے وزیر اعظم آزاد جموں و کشمیر راجہ فاروق حیدر کی ملاقات، مختلف امورپر گفتگو

کشمیری بھائیوں کے مسائل کے لئے تعاون جاری رہے گا اور حقوق کا تحفظ یقینی بنایا جائے گا، اسد عمر آزاد کشمیر اور گلگت بلتستان میں ویکسی نیشن کو مزید تیز کرنے کے لئے اقدامات اٹھائے جائیں،این سی اوسی اجلاس میں فیصلہ

جمعہ 11 جون 2021 19:00

اسد عمر سے وزیر اعظم آزاد جموں و کشمیر راجہ فاروق حیدر کی ملاقات، مختلف ..
اسلام آباد (اُردو پوائنٹ اخبارتازہ ترین - این این آئی۔ 11 جون2021ء) وفاقی وزیر برائے منصوبہ بندی ترقی اور خصوصی اقدامات اسد عمر سے وزیر اعظم آزاد جموں و کشمیر راجہ فاروق حیدر نے جمعہ کو یہاں ملاقات کی جس میں باہمی دلچسپی کے امور خصوصا آزاد کشمیر میں کورونا کی موجودہ صورتحال اور آزاد کشمیر کے انتخابات کی روشنی میں ویکشینیشن کے عمل کو تیز رفتاری سے مکمل کرنے کی ضرورت پر زور دیا گیا،ملاقات میں وزیرِ اعظم آزاد کشمیر نے وفاقی وزیر اسد عمر کو بتایا کہ کورونا کی صورتحال پہلے کی نسبت بہت بہتر ہے۔

انہوں نے کہا کہ وفاقی ، صوبائی اور علاقائی حکومتوں کی باہم مربوط پالیسیوں کی بدولت آزاد کشمیر بھی دوسرے علاقوں کی طرح بہت حد تک کورونا وبا کی تباہی سے محفوظ رہا ۔

(جاری ہے)

وفاقی وزیر اسد عمر نے وزیرِ اعظم آزاد کشمیر کو یقین دہانی کرائی کہ کشمیری بھائیوں کے مسائل کے لئے تعاون جاری رہے گا اور ان کے حقوق کا تحفظ یقینی بنایا جائے گا۔ اسد عمر نے آزاد کشمیر میں ویکسینیشن کے عمل کو تیز کرنے کے لیے وفاق کی جانب سے بھرپور تعاون کی یقین دہانی کرائی اور کہا کہ وفاقی حکومت آزاد کشمیر میں بڑے ویکسینیشن سنٹر اور موبائل ویکسینیشن ٹیمیں بنائے گی۔

وفاقی وزیر نے آزاد کشمیر میں انتخابات سے قبل ویکسینیشن کے عمل کو تیز کرنے کی ضرورت پر زور دیا۔بعد ازاں اپنے ٹوئٹ میں اسد عمر نے کہاکہ این سی او سی اجلاس میں فیصلہ کیا کہ آزاد کشمیر اور گلگت بلتستان میں ویکسی نیشن کو مزید تیز کرنے کے لئے اقدامات اٹھائے جائیں۔اپنے ٹویٹ میں کہا کہ وفاقی حکومت بڑے ویکسی نیشن سینٹر اور موبائل ویکسی نیشن ٹیمیں بنائے گی۔ آزاد کشمیر میں الیکشن کی وجہ سے اور گلگت بلتستان میں سیاحت کے سیزن کی وجہ سے ویکسی نیشن تیز کرنا ضروری ہے۔