بیرون ملک پھنسے پاکستانیوں کی واپسی کے لئے 32 خصوصی پروازوں کا اعلان

قومی ایئر لائن نے بیرون ملک پھنسے پاکستانیوں کووطن واپس لانے کیلئے آپریشن کا اعلان کردیا ، سی ای او ارشد ملک کی ہدایت پر ہم وطنوں کوعید سے قبل وطن لایا جائے گا

ساجد علی اتوار 11 جولائی 2021 17:27

بیرون ملک پھنسے پاکستانیوں کی واپسی کے لئے 32 خصوصی پروازوں کا اعلان

کراچی ( اُردو پوائنٹ تازہ ترین اخبار ۔ 11 جولائی 2021ء ) قومی ایئر لائن بیرون ملک پھنسے پاکستانیوں کی مدد کے لیے ایک بار پھر میدان میں آگئی، بیرون ملک پھنسے پاکستانیوں کی واپسی کے لیے 32 پروازیں چلائی جائیں گی ، سی ای او ارشد ملک کی ہدایت پر ہم وطنوں کوعید سےقبل وطن لایا جائے گا۔ تفصیلات کے مطابق قومی ایئر لائن کی جانب سے بیرون ملک پھنسے پاکستانیوں کو وطن واپس لانے کیلئے آپریشن کا اعلان کیا گیا ہے، اس مقصد کے لیے پی آئی اے عید الاضحیٰ سے قبل ہم وطنوں کو 32 خصوصی پروازوں کے ذریعے وطن واپس پہنچائے گی۔

پی آئی اے انتظامیہ نے بتایا ہے کہ کابل میں پھنسے ہوئے ہم وطنوں کو وطن پہنچانے کیلئے بوئنگ 777 طیارے استعمال کیے جائیں گے ، کابل کیلئے 12 اور 16 جولائی کو خصوصی پروازیں آپریٹ کررہے ہیں ، جب کہ خلیجی ممالک سے پاکستان آنے کیلئے 5 خصوصی پروازوں کا اضافہ کردیا گیا ہے۔

(جاری ہے)

انتظامیہ کے مطابق دبئی اور ابوظہبی سے پاکستانیوں کو بوئنگ 777 طیاروں کے ذریعے وطن پہنچایا جائے گا ، سعودی عرب کیلئے بھی 10 پروازوں کا اضافہ کردیا گیا ہے اور وہاں پھنسے پاکستانیوں کو وطن واپس لانے کے لئے بوئنگ 777 طیارے استعمال کیے جائیں گے، اس کے علاوہ تاشقند کیلئے بھی 8 خصوصی پروازیں آپریٹ کی جائیں گی اور تاشقند کیلئے ایئر بس 320 طیارے آپریٹ ہوں گے جب کہ پی آئی اے بشکک میں پھنسے ہوئے طالبعلموں کو وطن لانے کیلئے خصوصی پرواز آپریٹ کرے گی۔

دوسری طرف پاکستان میں عیدالاضحیٰ سے پہلے پی آئی اے کے لاہور سے کراچی کرائے میں ہوشربا اضافہ ہوگیا ، بڑی عید سے قبل عوامی رش کو دیکھتے ہوئے ناصرف قومی ایئر لائن بلکہ نجی فضائی کمپنیوں کی ٹکٹس بھی نایاب ہونے لگی ہیں جس کے پیش نظر کرائے میں ہوشربا اضافہ ہوچکا ہے اور اس وقت لاہور سے کراچی کا یکطرفہ کرایہ 13000 روپے تک پہنچ گیا ہے جب کہ دوطرفہ کرایا 25ہزار ہونے کی اطلاعات موصول ہوئی ہیں ۔