نورمقدم قتل کیس، عدالت نے ملزم کے والدین اور ملازمین 2 روزہ جسمانی ریمانڈ پر پولیس کے حوالے کردیے

لڑکی نے بھاگنے کے لیے روشندان سے باہر چھلانگ لگائی، ملازمین نے دیکھا کہ ملزم مقتولہ کو کھینچ کر اندر لے جارہا ہے، ملازمین اگر پولیس کو بروقت اطلاع دیتے تو قتل روکا جا سکتا تھا۔ پولیس کا عدالت میں موقف

ساجد علی اتوار 25 جولائی 2021 15:31

نورمقدم قتل کیس، عدالت نے ملزم کے والدین اور ملازمین 2 روزہ جسمانی ریمانڈ ..

اسلام آباد (اُردو پوائنٹ اخبارتازہ ترین۔ 25 جولائی2021ء) سابق سفارتکار کی بیٹی نورمقدم قتل کیس میں عدالت نے ملزم کے والدین 2 روزہ جسمانی ریمانڈ پر پولیس کے حوالے کردیے۔ تفصیلات کے مطابق اسلام آباد کی عدالت میں سابق سفارتکار کی بیٹی نور مقدم کے قتل کیس کی سماعت ہوئی ، جہاں ملزم ظاہر جعفر کی والدہ عصمت آدم، والد ذاکر جعفر اور 2 ملازمین کو عدالت میں پیش کیا گیا تو پولیس نے بتایا کہ لڑکی نے بھاگنے کے لیے روشندان سے باہر چھلانگ لگائی، ملازمین نے دیکھا کہ ملزم مقتولہ کو کھینچ کر اندر لے جارہا ہے ، ملازمین اگر پولیس کو بروقت اطلاع دیتے تو قتل روکا جا سکتا تھا ، اس لیے ملزمان کا ریمانڈ دیا جائے کیوں کہ موبائل فونز برآمد کرنے ہیں۔

اس موقع پر ملزم کے والدین کے وکیل نے کہا کہ میرے مؤکل قتل کی مذمت کرتے ہیں، میرے مؤکل چاہتے ہیں کہ انصاف ہو اور ملزم کو سخت سزا ہو ، میرے مؤکل ضمانت پر ہیں اس کے باوجود پولیس نے حراست میں لیا ، اس پر پولیس کے خلاف توہین کیس اور ایف آئی آر درج کروائیں گے۔

(جاری ہے)

دوران سماعت ملزم کے والدین نے کہا کہ ہم ملزم ظاہر جعفر کو سپورٹ نہیں کر رہے ، ہمیں علم ہوا کہ گھر میں شور شرابا ہو رہا ہے بعد میں پتا چلا کہ واقعہ ہو چکا ہے ، ہم تو خود کراچی سے اسلام آباد آئے اور تھانے پہنچ گئے۔

وکیل استغاثہ نے کہا کہ نور مقدم قتل کیس میں عدالتی نظام کو فالو نہیں کیا گیا ، عدالت سے استدعا ہے کہ ملزم کے والدین کا جسمانی ریمانڈ دیا جائے، ساتھی وکیل اگر ملزم کو پروٹیکٹ نہیں کر رہے تو والدین کو حراست میں رہنے دیں ، جس پر عدالت نے ملزم کے والدین اور دونوں ملازمین کا 2 روزہ جسمانی ریمانڈ منظور کرتے ہوئے انہیں پولیس کے حوالے کردیا۔