آزاد کشمیر اور سیالکوٹ کے دھاندلی زدہ انتخابات نے ن لیگ کے موقف کی تائید کر دی، احسن اقبال

یہ حکومت عوام کی منتخب کردہ نہیں، ایل اے 16 آزاد کشمیر میں دوبارہ ووٹنگ میں پی ٹی آئی کی کامیابی پر لیگی رہنما احسن اقبال کا ردعمل

دانش احمد انصاری جمعرات 29 جولائی 2021 23:36

اسلام آباد (اُردو پوائنٹ اخبارتازہ ترین۔ 29 جولائی2021ء) ن آزاد کشمیر اور سیالکوٹ کے دھاندلی زدہ انتخابات نے ن لیگ کے موقف کی تائید کر دی، یہ حکومت عوام کی منتخب کردہ نہیں، ایل اے 16 آزاد کشمیر میں دوبارہ ووٹنگ میں پی ٹی آئی کی کامیابی پر لیگی رہنما احسن اقبال کا ردعمل- تفصیلات کےمطابق ن لیگ کے مرکزی رہنما احسن اقبال نے سماجی رابطوں کی ویب سائٹ ٹویٹر پر اپنے ٹویٹ میں کہا ہے کہ آزاد کشمیر کے دھاندلی زدہ الیکشن اور سیالکوٹ کے متنازعہ ضمنی انتخابات نے مسلم لیگ ن کے اصولی موقف کی تائید کر دی ہے۔

ہمارا پہلے دن سے یہ موقف ہے کہ یہ حکومت عوام کی منتخب کردہ حکومت نہیں ہے۔ یہ دھاندلی ، دھونس، اور دھمکی کے زور پر قائم ہے۔ واضح رہے کہ آزاد کشمیر الیکشن میں ہونے والے الیکشن میں پاکستان تحریک انصاف نے ایل اے 16 باغ کی نشست بھی جیت لی ہے۔

(جاری ہے)

حلقے میں 4 پولنگ اسٹیشنوں پر ہوئی دوبارہ انتخابات میں پاکستان تحریک انصاف کے امیدوار سردار میر اکبر نے میدان مارلیا ، غیر حتمی غیر سرکاری نتائج کے مطابق حکمراں جماعت پی ٹی آئی سے تعلق رکھنے والے سردار میر اکبر نے 665 ووٹ حاصل کیے ، پاکستان پیپلزپارٹی کے امیدوار سردار قمر زماں خان 538 ووٹوں کے ساتھ دورے نمبر پر رہے جب کہ مجموعی طور پر ایل اے 16 باغ کے تمام 167 پولنگ اسٹیشنوں کے نتائج میں پی ٹی آئی کے میر اکبر نے 23 ہزار165 ووٹ حاصل کیے اور ان کے مقابلے میں دوسرے نمبر پر آنے والے پاکستان پیپلزپارٹی کے امیدوار قمرالزمان 22 ہزار 848 ووٹ حاصل کرسکے۔

یہ بھی خیال رہے کہ الیکشن کمیشن آزاد کشمیر نے باغ کے حلقہ ایل اے16 کے چار پولنگ اسٹیشنز پر دوبارہ ووٹنگ کا حکم دیا تھا ، جس کے باعث آج 29 جولائی کو چاروں پولنگ اسٹیشنز پر ری پولنگ ہوئی، الیکشن کمیشن کی جانب سے پولنگ اسٹیشنز نمبر 42،134،135،136 پر دوبارہ پولنگ کا حکم دیا گیا ، چاروں پولنگ اسٹیشنز پرکل ووٹرز کی تعداد 2380 ہے، جہاں صبح 8 بجے سے شام 5 بجے تک چاروں پولنگ اسٹیشنز پر ری پولنگ ہوئی جس میں پاکستان تحریک انصاف کے امیدوار سردار میر اکبر نے 665 ووٹوں کے ساتھ میدان مارلیا جب کہ پاکستان پیپلزپارٹی کے امیدوار سردار قمر زماں خان 538 ووٹوں کے ساتھ دورے نمبر پر رہے۔

واضح رہے گزشتہ روز 26 جولائی کو چیف الیکشن کمشنر آزاد کشمیر عبد الرشید سلہریا نے آزاد کشمیرکے 44 حلقوں کے نتائج کا اعلان کرتے ہوئے اعلان کیا تھا کہ تحریک انصاف نے 25، پیپلز پارٹی 11اور مسلم لیگ (ن) نے چھ نشستیں حاصل کیں ،آزاد جموں و کشمیر کے ایک حلقے ایل اے 16 کے 4 پولنگ اسٹیشنوں پر دوبارہ پولنگ ہوگی، کسی بھی حلقے کے رزلٹ نہیں روکے گئے ، آزاد جموں و کشمیر کے انتخابات میں ٹرن آئوٹ 62 فیصد رہا ۔